Guðni færði finnsku þjóðinni listaverk eftir Hrein Friðfinnsson

Guðni Th. Jóhannesson forseti færði finnsku þjóðinni listaverkið Afsteypu - Cast - eftir Hrein Friðfinnsson að gjöf í tilefni af hundrað ára afmæli sjálfstæðis Finna í Helsinki í dag.

Í tilkynningu frá skrifstofu forseta Íslands segir að listaverkinu fylgi áritaður skjöldur þar sem fram komi að gjöfin sé frá ríkisstjórn Íslands til finnsku þjóðarinnar. 

„Hreinn Friðfinnsson er í hópi ástsælustu myndlistarmanna samtímans á Íslandi. Hann nýtur virðingar á Norðurlöndum, einkum í Finnlandi, en hafa má til marks um það að Hreinn hlaut hin norrænu Carnegie verðlaun árið 2000 og sama ár viðurkenningu Ars Fennica, sem Finnar veita framúrskarandi samtímalistamönnum á hverju ári. 

Verk Hreins eru til sýnis á virtum samtímalistasöfnum víða um heim, bæði opinberum söfnum og einkasöfnum. Listamaðurinn hefur um árabil verið í samstarfi við eitt nafntogaðasta samtímalistagallerí Finnlands sem hefur kynnt verk hans þar og á alþjóðlegum myndlistarviðburðum víða um lönd,“ segir í tilkynningunni.