Fær tvo milljarða fyrir að hætta í vinnunni

Marissa Mayer mun hætta sem framkvæmdastjóri Yahoo eftir að Verizon gengur frá kaupsamningi á fyrirtækinu. Hún mun fá 23 milljónir dollara í starfslokasamning, eða sem nemur 2,3 milljörðum króna.

Business Insider greinir frá því að Verizon hafi í dag tilkynnt um að hafa keypt Yahoo fyrir 4,48 milljarða dollara. Sem liður í yfirtökunni mun Mayer hætta sem framkvæmdastjóri eftir fimm ára starf.

Yahoo mun sameinast AOL í fyrirtækinu Oath, en Verizon keypti AOL árið 2015 fyrir 4,4 milljarða dollara. Búist er við að 15 prósent starfsmanna Oath verði sagt upp, eða um 2.100 manns, vegna sameiningar.