Sigmundur Davíð segir vogunarsjóðina sigurvegara kosninganna

Fyrrverandi forsætisráðherra, Sigmundur Davíð Gunnlaugsson, fullyrðir að „vogunarsjóðirnir og fjármálakerfið“ hafi verið sigurvegarar þingkosninganna síðasta haust. Vogunarsjóðir í New York og London hafi sérstaklega viljað nýjan forsætisráðherra, nýja ríkisstjórn og nýja stefnu.

Aðgerðir ríkisstjórnar Sigmundar Davíðs til að losa fjármagnshöft eru umfjöllunarefni í aðsendri grein hans sem birtist í Morgunblaðinu í morgun. Skrifar hann að þær aðgerðir hafi gjörbreytt stöðu íslensks samfélags til hins betra. Greinin ber titilinn „Fjármálakerfið vann kosningarnar“.

Í kjölfar þesara aðgerða skrifar fyrrverandi forsætisráðherra að Íslendingar hafi fengið aukna innsýn í hvaða aðferðum „aðilar eins og þeir sem hugðust hagnast á efnahagslegum óförum Íslands“ beita.

„Það fór ekki leynt að þessir aðilar, einkum vogunarsjóðir í New York og London, vildu nýjan forsætisráðherra, nýja ríkisstjórn og nýja stefnu. Öllu þessu náðu þeir,“ skrifar Sigmundur Davíð.

Sakar ríkisstjórnina um u-beygju gagnvart vogunarsjóðunum

Þó að Sigmundur Davíð segi að „sigur Íslands“ hafi að mestu verið í höfn áður en ríkisstjórnarskipti áttu sér stað gremst honum að ekki hafi gegnið nógu hratt að klára að leysa aflandskrónuvandann og endurskipuleggja fjármálakerfið til þess að það þjóni betur hagsmunum almennings og atvinnulífs.

Segist Sigmundur Davíð meðal annars hafa stigið til hliðar sem forsætisráðherra á sínum tíma til að skapa frið til að ljúka þessum málum. Einnig segist hann hafa talið það vera „afleitt fordæmi að setja að leyfa vogunarsjóðum að ná sínu fram með misjöfnum aðferðum á Íslandi“.

Sakar hann núverandi ríkisstjórn um algjöra U-beygju gagnvart „hinum aðgangshörðu vogunarsjóðum“. Ríkisstjórnin sé að missa tækifærið til að laga íslenska fjármálakerfið úr höndunum. 

Vísar Sigmundur Davíðs til þess að sjóðirnir hafi „beygt“ íslensk stjórnvöld með því að taka ekki þátt í útboði fyrir aflandskrónueigendur í vor og ógagnsæi um sölu Arionbanka.

Óljóst sé hvað vogunarsjóðirnir ætli að gera við Arion banka. Ekkert liggi fyrir um hvað stjórnvöld ætli sér með Landsbankann og staða hins ríkisbankans, Íslandsbanka, sé svo algjör ráðgáta, að sögn Sigmundar Davíðs. Á meðan sé vöxtum haldið tuttugu sinnum hærri en í Bretlandi á sama tíma og pundið falli og íslenska krónan styrkist.

„Það eina sem liggur fyrir er að sigurvegarar síðustu alþingiskosninga voru vogunarsjóðirnir og fjármálakerfið,“ skrifar fyrrverandi forsætisráðherra.

Sakaði kröfuhafa um að elta sig og brjótast inn í tölvu

Sigmundur Davíð hefur ítrekað sakað erlenda vogunarsjóði um að beita bellibrögðum í tengslum við afnám hafta og meðferð slitabúa föllnu bankanna.

Í viðtali við Reykjavík síðdegis á Bylgjunni í mars sagði hann þannig að hann og fleiri ráðherrar í síðustu ríkisstjórn hafi fengið tilboð á vegum erlendra vogunarsjóða. Aðilar á vegum þeirra hafi meðal annars elt hann á ráðstefnu í London og boðið honum á fund í bjálkakofa í Norður-Dakóta.

Á haustþingi miðstjórnar Framsóknarflokksins árið 2016 sagði Sigmundur Davíð að erlendir kröfuhafar hefðu fylgt sér eftir á undanförnum árum. Gaf hann í skyn að þeir hefðu brotist inn í tölvu sína þegar hann var forsætisráðherra.