Olíuverð ekki lækkað meira í tuttugu ár

Olíuverð hefur haldið áfram að lækka þrátt fyrir samkomulag OPEC-ríkja um að draga úr framleiðslu. Um eftirmiðdaginn í gær hafði Brent hráolía lækkað um 0,74 prósent, en West Texas hráolía um 0,41 prósent.

Reuters greinir frá því að það sem af er ári hafi olíuverð lækkað um rúmlega 20 prósent, sem er mesta lækkun á hálfu ári frá því árið 1997. Um eftirmiðdaginn í gær kostaði tunna af West Texas hráolíu 43,33 dollara, en kostaði 53,72 dollara í árslok 2016. Brent hráolía lækkaði úr 56,82 dollurum í 45,7 dollara á sama tímabili.

OPEC-ríkin og aðrir olíuframleiðendur ákváðu að minnka framleiðslu um 1,8 milljónir tunna á dag frá og með janúar.

Carsten Menke, greiningaraðili hjá Julius Baer, segir í samtali við Reut­ers að ekki virðist hægt að stöðva lækkun olíuverðs. Fólk sé í auknum mæli með efasemdir um áhrif framleiðslusamnings OPEC-ríkjanna.

Olíuframleiðendur virðast hafa virt samkomulagið um að draga úr framleiðslu, hins vegar voru nokkrir framleiðendur, þeirra á meðal Írak, Sádi-Arabía og Rússland, sem framleiddu gríðarlega mikið í aðdraganda samningsins, það getur hafa haft áhrif til lækkunar olíuverðs.