Íslendingar draga ráðherra Eystrasaltsráðsins til fyrsta fundar í fjögur ár

Utanríkisráðherrar Eystrasaltsráðsins ásamt fulltrúa Evrópusambandsins funduðu um framtíð sína og fleira á fundi í Reykjavík í dag.  Þetta er í fyrsta skipti í fjögur ár sem ráðherrar allra ríkjanna koma saman til fundar.

Öll Norðurlöndin, Eystrasaltsríkin þrjú, Þýskaland, Pólland og Rússland eiga aðild að Eystrasaltsráðinu sem stofnað var fyrir 25 árum en á fundinum í Reykjavík í dag var einnig fulltrúi Evrópusambandsins. En vegna yfirtöku Rússa á Krímskaga og hernaðarlegra afskipta í Úkraínu, hefur ekki verið haldinn ráðherrafundur í ráðinu í fjögur ár.

Guðmundur Árni Stefánsson, sendiherra og formaður Eystrasaltsráðsins, segir Íslendinga hafa gegnt formennsku í því í eitt ár og lagt áherslu á að koma þessum fundi á.

„Við vildum þetta samtal á. Þótt það væru erfiðleikar milli þjóðanna þyrfti samtal stjórnmálamanna til að ýta málum áfram. Það er ekkert launungarmál að Eystrasaltslöndin voru treg í taumi. En kannski vegna vinfengis þeirra við Íslendinga fyrr og síðar hafi gert það að verkum að þau gáfu eftir. Því þetta ráð byggir á að allir séu einhuga um niðurstöðu,“ segir Guðmundur Árni.

Á meðal fundarefna í dag var framtíð svæðisins, svæðisbundin innleiðing heimsmarkmiða Sameinuðu þjóðanna, almannavarnir og samstarf um rannsóknir og nýsköpun. Þá voru áherslumál formennsku Íslands um réttindi barna, lýðræði og jafnrétti til umræðu.

Guðmundur Árni segir að vissulega hafi hegðun Rússa undanfarin ár haft truflandi áhrif en öryggismál séu ekki rædd í Eystrasaltsráðinu.

„En auðvitað tengist þetta hinni stóru mynd. Það er auðvitað togstreyta til staðar. En við Íslendingar segjum alltaf; tökum samtalið og reynum að finna sameiginlega niðurstöðu og skilning,“ segir Guðmundur Árni.