Orðastríðið hefst í Staples Center

Það er nú búið að gefa það formlega út að fyrsti blaðamannafundur Conor McGregor og Floyd Mayweather fer fram í Staples Center í Los Angeles á þriðjudag.

Á dögunum lak það út að fyrsti blaðamannafundurinn yrði á Wembley í Lundúnum en það reyndist ekki vera rétt.

Fastlega er búist við því að þeir félagar muni rífast á fleiri blaðamannafundum víðar um heiminn og því ekkert ólíklegt að einn slíkur fari fram á Wembley.

Báðir kappar eru ekki bara góðir í sinni íþrótt heldur kunna þeir þá list að rífa kjaft betur en flestir aðrir.

Það er því búist við flugeldasýningu á þriðjudag er þeir byrja að móðga hvorn annan.