Sunna: Þetta er allt á réttri leið

„Ég er rosalega ánægð. Ég gerði margt betur, en það er sumt sem ég þarf að laga. Ég þarf að vinna í því að bæta mig,“ sagði Sunna Rannveig Davíðsdóttir í samtali við Vísi í dag.

Sunna var að vonum hæstánægð eftir sigurinn á Kelly D'Angelo í Kansas í gærkvöldi. Þetta var fyrsta tap D'Angelo á ferlinum, hvort sem það er í MMA eða hnefaleikum.

„Hún er með góðar hendur og góð standandi. Mér fannst ég eiga fullt erindi í hana í gólfinu en hún stóð alveg uppi í hárinu á mér standandi,“ sagði Sunna sem hefur unnið alla þrjá bardaga sína sem atvinnumaður.

„Þetta er allt á réttri leið. Ég lagði rosalega hart að mér fyrir þennan bardaga og gerði allt sem ég gat í undirbúningnum,“ bætti Sunna við.

Nánar verður rætt við Sunnu í Fréttablaðinu á morgun.