Aron mögulega á förum frá Werder Bremen

Svo gæti farið að Aron Jóhannsson yfirgæfi herbúðir Werder Bremen til að fá að spila meira.

Aron gekk í raðir Bremen frá AZ Alkmaar árið 2015 en hefur aðeins leikið 15 deildarleiki með liðinu á tveimur árum.

„Aron hefur gert tilkall til þess að spila en við höfum alltaf sagt að það er samkeppni til staðar,“ sagði Frank Baumann, íþróttastjóri Bremen, í samtali við Kicker.

„Aron hefur sagt að hann muni íhuga framtíð sína ef hann fær ekki að spila. Við sjáum hvað gerist á næstu dögum og vikum.“

Aron á tvö ár eftir af samningi sínum við Bremen sem endaði í 8. sæti þýsku úrvalsdeildarinnar á síðasta tímabili.

„Aron er leikmaður sem önnur félög hafa áhuga á en það er undir honum komið að meta hvað er áhugavert fyrir hann,“ sagði Baumann.

Aron, sem á 19 landsleiki að baki fyrir Bandaríkin, hefur m.a. verið orðaður við lið í MLS-deildinni vestanhafs.