Fyrirtækið á bakvið óhræddu stúlkuna sakað um launamisrétti

Fyrirtækið State Street Global Advisors, sem lét setja upp styttu af óhræddri stúlku á móti hinu fræga nauti Wall Street, þarf að borga fimm milljónir dollara vegna launamisréttis.

Vinnumálaráðuneyti Bandaríkjanna hefur sakað fyrirtækið um að borga hundruðum kvenkyns yfirmönnum lægri laun en karlkyns jafnokum þeirra.

Styttan af stúlkunni var reist í tilefni af alþjóðlegum baráttudegi kvenna og átti hún að vekja athygli á launamun kynjanna. Fyrirtækið hefur neitað ásökunum um að laun hafi ekki verið jöfn og segist vilja binda endi á málið.

Lægri laun til kvenna og svartra

Fyritækið mun borga tiltekna upphæð samkvæmt samkomulagi til yfir 300 hátt settra kvenkyns starfsmanna sem fengu lægri laun en karlar í sömu stöðum.

Samkomulagið tekur einnig til áskana um að fyrirtækið hafi borgað 15 svörtum starfsmönnum lægri laun en hvítum jafningjum þeirra.

Þegar styttunni af Óhræddu stúlkunni var komið upp sagði fyrirtækið að hún ætti að tákna framtíðina. Í kjölfar þess að styttan var sett upp krafðist Arturo Di Modica, listamaðurinn sem hannaði nautið fræga, að styttan yrði fjarlægð. Borgaryfirvöld í New York hafa hins vegar gefið leyfi fyrir því að styttan standi út febrúar árið 2018.