Neymar, Suárez og Cavani skutu eintómum púðurskotum

Ekkert mark var skorað í fyrstu tveimur leikjum kvöldsins í Suður-Ameríkuhluta undankeppni HM 2018.

Brasilía og Bólivía gerðu markalaust jafntefli í La Paz. Leikurinn skipti engu máli. Brassar eru komnir á HM og búnir að vinna Suður-Ameríkuriðilinn á meðan Bólivíumenn eiga ekki möguleika á að komast á HM.

Úrúgvæ er kominn með annan fótinn til Rússlands eftir markalaust jafntefli við Venesúela í San Cristóbal.

Úrúgvæar eru í 2. sæti riðilsins með 28 stig og það þarf mikið að gerast ef þeir verða ekki með á þriðja heimsmeistaramótinu í röð. Venesúela er á botni riðilsins með aðeins níu stig.