Páll ósammála Ásmundi en segir viðbrögð við greininni yfirdrifin

Páll Magnússon, oddviti Sjálfstæðismanna í Suðurkjördæmi, segist ósammála þeirri framsetningu sem þingmaðurinn Ásmundur Friðriksson setur fram í grein um hælisleitendur og birtist í Morgunblaðinu í gær. „Ég er ósammála því hvernig hann tengir saman óskylda hluti eins og kostnað vegna hælisleitenda, sem er þó alveg umræðunnar virði, og útgjöld vegna annarra mála“, segir Páll.

Ásmundur sagði í grein sinni að ræða þurfi kostnað íslenska ríkisins vegna hælisleitenda. Vill þingmaðurinn meina að þöggun ríki um málefnið og að heimafólk líði fyrir fjölgun hælisleitenda á Íslandi.

Finnst þér Ásmundur gera þér og öðrum á lista Sjálfstæðismanna í Suðurkjördæmi erfitt fyrir með þessum orðum sínum?

„Það kann að vera, en síðan verða menn að þola það að í stórum flokki hafa menn mismunandi skoðanir á því hvernig eigi að ganga fram í einstökum málum. Mér finnst síðan viðbrögðin við þessari grein Ásmundar líka vera óþarflega harkaleg. Eins og þegar verið er að stilla Ásmundi upp sem rasista. Nú þekki ég Ásmund ágætlega og ég veit að það er hann ekki. Þó ég sé ósammála þessari framsetningu þá er ekkert í þessari grein sem gefur það til kynna að Ásmundur Friðriksson sé rasisti. Viðbrögðin eru yfirdrifin.“

Greinin kalli ekki á útstrikanir

Davíð Þorláksson, fyrrverandi formaður Sambands ungra Sjálfstæðismanna, og Magnús Sigurbjörnsson, fyrrverandi framkvæmdastjóri borgarstjórnarflokks Sjálfstæðisflokksins, eru í hópi þeirra sem hafa á samfélagsmiðlum hvatt Sjálfstæðismenn í Suðurkjördæmi til að strika yfir nafn Ásmundar vegna afstöðu hans.

Aðspurður um málið ítrekar Páll að honum þyki viðbrögðin við grein Ásmundar yfirdrifin. „Grein Ásmundar er ekki þess eðlis að mínu viti að hún kalli á viðbrögð af því tagi.“

Málsmeðferðartími hælisleitenda styttur

Páll leggur áherslu á að það að í þessari umræðu verði að gera greinarmun á þeim eðlismun sem sé á flóttamönnum annars vegar og hælisleitendum hins vegar. Þetta séu algerlega óskyld mál og segir hann að vandamálið varðandi framkvæmdina hafi verið sá langi málsmeðferðartími sem hafi snúið að hælisleitendum.

„Það er beinlínis ómannúðlegt að taka átján mánuði, eins og þetta var orðið, í að komast að þeirri niðurstöðu að þeir ættu ekki réttmæta kröfu á dvöl hér á Íslandi. Eftir átján mánaða dvöl, þegar fólk var byrjað að aðlagast landinu – krakkar kannski byrjaðir í skóla og fólk komið í vinnu – að þá komust íslensk stjórnvöld kannski að því að krafa þeirra um hæli væri ekki á rökum reist.

Sem betur fer er nú fyrir tilstilli okkar Sjálfstæðismanna búið að koma þessum málsmeðferðartíma úr því að vera átján mánuðir í rúmlega 50 daga, eins og hann er orðinn. Það gerir afgreiðsluna á þessum málum skilvirkari og mannúðlegri. Þetta finnst mér eiginlega vera aðalatriði málsins,“ segir Páll.

Íslendingar ekki stikkfrí

Unnur Brá Konráðsdóttir, sem skipar fjórða sæti Sjálfstæðismanna í Suðurkjördæmi, tjáir sig einnig um málið á Facebook-síðu sinni í dag. Segir hún Íslendinga ekki geta verið stikkfrí í því að takast á við það að fjölmargir standi frammi fyrir raunverulegri neyð. „Við viljum heldur ekki vera stikkfrí í því verkefni því í slíkri afstöðu felst enginn kærleikur og hreint út sagt engin glóra,“ segir Unnur Brá, en færslu hennar má sjá í heild sinni að neðan.