Betra fyrir íslenska liðið að spila á HM en EM

Íslenska fótboltalandsliðið getur nú farið að undirbúa sig fyrir heimsmeistaramótið í fótbolta á meðan aðrar þjóðir eru enn að berjast fyrir farseðli sínum til Rússlands.  Margir mun eflaust bera saman uppsetningu heimsmeistaramótsins 2018  við það hvernig Evrópumótið var sett upp sumarið 2016.

Íslenskt knattspyrnuáhugafólk er farið að horfa til sumarsins og margir eflaust farnir að skipuleggja sumarfríið sitt í Rússlandi.

Það verður ekki dregið í riðla í keppninni fyrr en 1. desember næstkomandi og það er erfitt að negla niður einhverja dagskrá fyrr en að það kemur í ljós í hvaða riðli, við hvaða þjóðir og á hvaða dögum íslenska liðið kemur til með að spila.

Íslenska landsliðið tók þátt í Evrópumótinu í Frakklandi fyrir að verða einu og hálfu ári síðan að þar sem íslenska liðið var með sama byrjunarlið í öllum fimm leikjunum.

Það er líklegt að Heimir Hallgrímsson muni ekki gera margar breytingar á byrjunarliði sínu á HM næsta sumar og álagið og ábyrgðin verður því á sömu mönnunum.

Tími á milli leikja mun því skipta íslenska liðinu miklu máli enda þurfa okkar menn að fá daga til að jafna sig.

Á Evrópumótinu í Frakklandi 2016 voru þrír dagar á milli leikja íslenska liðsins í riðlinum en sá tími gæti lengst á HM í Rússlandi.

Íslenska liðið fékk fjóra daga til að undirbúa sig fyrir leikinn á móti Englandi í sextán liða úrslitunum (22. júní til 27. júní) sem kom sér mjög vel.

Það má búast við því að fjórir dagar verði á milli flestra leikja íslenska liðsins á HM í Rússlandi eins og Magnús Már Einarsson bendir á í frétt sinni á fótbolta.net.

Þetta er reyndar ekki algilt því það eru einhverjar undantekningar. Síðasti riðillinn, H-riðilinn, er sem dæmi með aðeins þrjá daga á milli leikja og það væri því ekkert gott að lenda í honum.

Hinsvegar gæti verið betra fyrir íslenska liðið að spila á HM en EM því liðið spilar væntanlega þrjá leiki sína í riðlunum á ellefu dögum í stað níu daga eins og á Evrópumótinu í Frakklandi.

Á móti kemur reyndar að það geta verið mun lengri ferðalög á milli leikstaða verði íslenska liðið óheppið með leikvelli. Það gæti því tekið sinn toll á móti.

Verði íslenska liðið hinsvegar heppið með ferðalög á meðan mótinu stendur þá ætti þessi aukadagur að nýtast lykilmönnum liðsins vel að safna orku fyrir næsta leik.