Sjáið mörkin sem Sara Björk skoraði í Meistaradeildinni í gær | Myndband

Íslenski landsliðsfyrirliðinn Sara Björk Gunnarsdóttir átti mjög góðan leik með þýska liðinu VfL Wolfsburg í Meistaradeildinni í gær.

Sara Björk skoraði tvö mörk í leiknum en hún kom liðnu í 1-0 og 3-0 í þessum 4-0 sigri. Hún hefur þegar skorað þrjú mörk í Meistaradeildinni á tímabilinu.

Sara Björk skoraði meðal annars langþráð fyrsta mark Wolfsburg í leiknum í upphafi seinni hálfleiks en þýska liðið var búið að vera í nær samfelldri stórsókn allan fyrri hálfleikinn.

VfL Wolfsburg hefur nú sett inn svipmyndir frá leiknum á Youtube-síðu sína og má sjá mörkin hennar Söru og öll hin færin í myndbandinu hér fyrir neðan.

Fyrra markið hennar kemur eftir rúmar þrjár mínútur af myndbandinu en hún skoraði þá af stuttu færi eftir sendingu frá hinni dönsku Pernille Harder. Smá rangstöðulykt en mark samt dæmt gilt.  

Seinna mark Söru kemur eftir 4:20 í myndbandinu en í millitíðinni þá skorar Pernille Harder. Aftur er okkar kona réttur maður á réttum stað og kemur boltanum í markið.