Átta leikir voru spilaðir í NBA deildinni í körfubolta í nótt. Boston Celtics hafa nú unnið ellefu leiki í röð, en liðið bar sigurorð af Charlotte Hornets á heimavelli, 90-87.
Hornets leiddu í hálfleik, 57-41, og mest með 18 stigum í seinni hálfleik áður en að Celtics tóku öll völd seint í þriðja leikhluta og sigldu sigrinum í höfn.
Ungu strákarnir Jason Tatum og Jaylen Brown, sem hafa verið frábærir í vetur, fóru fyrir liði Celtics í fjarveru Kyrie Irving. Tatum með 16 stig og Brown með 10 stig og 13 fráköst, tvöföld tvenna.
Kyrie varð fyrir því óhappi að fá olnboga í andlitið frá samherja sínum, Aron Baynes, eftir tæplega tvær mínútur í fyrsta leikhluta og þurfti að yfirgefa völlinn vegna hugsanlegs heilahristings.
Paul George átti stórleik í liði Oklahoma City Thunder sem hafði betur gegn L.A. Clippers 120-111. George skoraði 42 stig í leiknum ásamt því að taka 9 fráköst og gefa 7 stoðsendingar.
Thunder unnu þar með sinn fyrsta leik í fjórum leikjum en þeir héldu krísufund eftir tap gegn Denver Nuggets í fyrranótt.
Þá unnu Milwaukee Bucks góðan sigur, 94-87, á San Antonio Spurs á útivelli. Gríska fríkið, eins og Giannis Antetokounmpo er kallaður, fór fyrir liði Bucks sem áður með 28 stig og 12 fráköst.
Önnur úrslit næturinnar:
Atlanta Hawks - Detroit Pistions 104-111
Indiana Pacers - Chicago Bulls 105-87
Orlando Magic - Phoenix Suns 128-112
Miami Heat - Utah Jazz - 84-74
Brooklyn Nets - Portland Trailblazers 101-97
Ellefti sigur Celtics í röð
