Níu stoðsendingar besti árangur Íslandsmótsins

Hallgrímur Mar Steingrímsson, Jósef Kristinn Jósefsson, Svava Rós Guðmundsdóttir og Stephany Mayor voru heiðruð fyrir það að hafa átt flestar stoðsendingar í Pepsi deildunum í sumar í útgáfuhófi bókarinnar Íslensk knattspyrna 2017.

Víðir Sigurðsson, blaðamaður íþróttadeildar Morgunblaðsins, gefur bókina út eins og hann hefur gert síðustu ár.

Hallgrímur og Jósef lögðu upp 9 mörk hvor fyrir sín félög, KA og Stjörnuna. Næstir voru Guðjón Pétur Lýðsson, Jóhann Laxdal og Martin Lund með 7 stoðsendingar.

Svava Rós og Stephany áttu einnig 9 stoðsendingar, en Berglind Björg Þorvalsdóttir og Vesna Elísa Smiljkovic voru næstar með 8 stykki.

Þór/KA fékk heiðursverðlaun Bókaútgáfunnar Tinds fyrir frábært uppbyggingastarf í knattspyrnu kvenna og Íslandsmeistaratitilinn árið 2017.