Gul viðvörun víða um land á morgun

Veðurstofan hefur gefið út gula viðvörun fyrir Suðurland, Faxaflóa, Breiðafjörð, Vestfirði, Strandir, Norðurland vestra og Suðausturland. Búast má við hvassviðri og hríðarveðri í kvöld og á morgun. Þegar er farið að hvessa allhressilega á Suðausturlandi en meðalvindur hefur farið yfir 20 m/s.

„Þetta er viðvörun í dag og á morgun,“ segir Haraldur Eiríksson veðurfræðingur í samtali við Vísi.

„Það er sem sagt áfram viðvörun hérna suðaustantil í dag en hinar gilda á morgun. Það er á morgun er þetta áfram hérna suðaustanlands bara vindstrengur, óbreytt. En hins vegar er síðdegis verið að vara við hvössum vindi hérna á Faxaflóanum og þá aðallega vindhviðum við fjöll. Svo má segja að hin viðvörunin hún er norðvestanvert landið. Þar er verið að vara við hríðarveðri annað kvöld.“

Höfuðborgarsvæðið sjálft er undanskilið viðvöruninni,

„Á Faxaflóanum er aðallega verið að spá vindhviðum við fjöll eins og Kjalarnesið og Hafnarfjallið og víðar. Þeir sem verða á ferðinni verða að sýna aðgát,“ segir Haraldur.

Veðurhorfur á landinu

Austan og norðaustan 10-18 m/s, en 20-25 syðst á landinu og með ströndinni að Öræfajökli. Dálítil slydda eða snjókoma SA-lands, annars þurrt. Mun hægari vindur NA-til á landinu og sums staðar él í kvöld.

Frost 0 til 15 stig, kaldast á NA-landi, en hiti kringum frostmark sunnan heiða.

Austan hvassviðri eða stormur á suðurhelmingi landsins á morgun og rigning eða slydda, en snjókoma á heiðum. Heldur hlýnandi. Hvessir einnig með snjókomu fyrir norðan um kvöldið.

Veðurhorfur á landinu næstu daga

Á þriðjudag:

Austan 10-20 m/s N-til á landinu, hvassast við ströndina, annars mun hægari. Víða slydda, rigning eða snjókoma en úrkomulítið SV-lands. Hiti kringum frostmark. Norðlægari um kvöldið og snjókoma fyrir norðan, en þurrt sunnan heiða.

Á miðvikudag:

Hvöss norðustanátt og snjókoma eða slydda, en þurrt á S- og SV-landi. Hiti um frostmark, en vægt frost í innsveitum.

Á fimmtudag:

Minnkandi norðanátt og víða léttskýjað S- og V-lands, en dálítil él á N- og A-landi. Kólnandi veður.

Á föstudag:

Suðaustanátt og dálítil snjókoma S- og V-lands, annars skýjað og þurrt. Frost 0 til 12 stig, kaldast á NA- og A-landi.

Á laugardag:

Austlæg eða breytileg átt, úrkoma víða um land og hiti kringum frostmark.