Svindlarar segja Gylfa hættan í boltanum og hala inn peningum á Bitcoin

Svikarar sem héldu því fram á dögunum að Ólafur Jóhann Ólafsson hefði hannað Bitcoin-kerfi sem breytt hafi lífi fjölmargra Íslendinga hafa nú snúið sér að Gylfa Þór Sigurðssyni, landsliðsmanni í fótbolta. Í sambærilegri falsfrétt sem er nú á dreifingu á Facebook segir að Gylfi hafi hætt í boltanum og hali nú inn peningum með „Bitcoin Code“ kerfinu sem hann á sjálfur að hafa þróað.

Í keyptri auglýsingu á Facebook segir að forritið sem Gylfi hafi búið til muni tryggja bjarta fjárhagslega framtíð fyrir alla Íslendinga.

Falsfréttinni er stillt upp þannig að Gylfi hafi verið í sjónvarpsviðtali um málið við fréttakonu sjónvarpsstöðvar í Los Angeles. Einhverra hluta vegna á Gylfi þó að vera staddur á strönd í Pretoríu í Suður-Afríku.

Sjá einnig: Ólafur sagður Bitcoin-frumkvöðull í falsfrétt: „Myndi ekki kaupa Bitcoin frekar en tréspíra af vafasömum sprúttsala“



Lögreglan á höfuðborgarsvæðinu hefur varað við svikamyllum sem þessari. Þær auglýsa starfsemi sína á samfélagsmiðlum og í gegnum falsfréttir sem líti sannfærandi út. Lögreglan segir að erfitt geti reynst að endurheimta peninga, láti einhver ginnast af svikunum.

Í tilkynningu lögreglu segir að svindl fyrirtækjanna felist fyrst og fremst í því að sannfæra einstaklinga um að leggja inn fé sem nota á í „viðskiptaplan og tölvustýrða áhættu.“ Í flestum tilvikum hverfa peningarnir þó fljótt og örugglega í viðskiptum sem aldrei áttu sér stað. Svo hringi téðir miðlarar aftur og bjóði upp á frekari gróðatækifæri gegn því að fólk leggi meira fé inn á reikninga fyrirtækisins.