Alltaf sjóðandi heitur á móti bestu liðum deildarinnar

Haukar eru með tveggja stiga forskot á toppi Domino´s deild karla í körfubolta eftir sigur á Íslandsmeisturum KR í gær. Frábært gengi liðsins í innbyrðisleikjum toppliðanna vekur mikla athygli og þá ekki síst frammistaða eins leikmanns í þessum leikjum.

Bandaríkjamaðurinn Paul Anthony Jones skoraði aðeins 9 stig í stórsigri á Njarðvík fyrir helgi. Haukarnir þurftu ekki á honum að halda í þeim leik en þeir þurftu á honum að halda á Ásvöllum í gærkvöldi.

Paul Jones brást ekki sínum mönnum ekki frekar en í leikjum á móti bestu liðum Domino´s deildarinnar í vetur. Hann skoraði 35 stig í gærkvöldi og hitti úr 16 af 22 skotum sínum. Það gerir 73 prósent skotnýtingu.

Haukar lögðu með sigrinum grunninn að deildarmeistaratitli og þetta var besti leikur Jones í vetur þegar kemur að stigaskori (35 stig) og framlagi (37 stig).

Jones hefur hinsvegar alltaf verið sjóðandi heitur á móti bestu liðum deildarinnar. Hann er með 22 stig í leik og 69 prósent skotnýtingu á móti þeim. Haukaliðið hefur líka unnið 4 af þessum fimm leikjum þar af þá fjóra síðustu og ekki síst vegna framlags Jones.

Paul Jones hefur hitt úr 56 prósent eða betur í öllum leikjum sínum á móti efstu liðum deildarinnar eða liðunum sem eru að keppa við Hauka um deildarmeistaratitilinn. Það eru lið ÍR, Tindastóls og KR. Hann er með betri en 66 prósent nýtingu í fjórum þessara leikja.

Hér fyrir neðan má síðan sjá samanburð á tölfræði Jones á móti topp 4 annarsvegar og botn 8 hinsvegar.



Gerir mest á móti bestu liðum Domino´s deildarinnar.

Paul Anthony Jones á móti bestu liðunum

(ÍR, Tindastóll og KR)

5 leikir (4 sigurleikir - 1 tap)

22,0 stig í leik

69,1 prósent skotnýting

---

Paul Anthony Jones á móti hinum átta liðunum í deildinni

(Njarðvík, Grindavík, Stjarnan, Keflavík, Þór Þ., Valur, Þór Ak. og Höttur)

14 leikir (11 sigurleikir - 3 töp)

17,1 stig í leik

55,7% skotnýting