Greiðslur til þingmanna verði aðgengilegar á heimasíðu Alþingis

Stefnt er að því að skýrar upplýsingar um kostnað og greiðslur til þingmanna verði brátt aðgengilegar á heimasíðu Alþingis. Forseti þingsins kveðst sammála ákalli um aukið gagnsæi. Aftur á móti geti þingið ekki endurskoðað gjaldskrána sem þingmenn fá greitt eftir.

Samkvæmt gildandi reglum er þingmönnum ætlaðar ýmsar aukagreiðslur. Þannig fá m.a. formenn nefnda, flokka og varaforsetar álag allt frá 15% og upp í 50% ofan á laun sín. Þingmenn utan af landi fá fasta mánaðarlega greiðslu og í sumum tilvikum álag að auki. Þá er greiddur ferðakostnaður án takmarkana fyrir akstur innan og utan kjördæmis. Ofan á þetta bætist svo kostnaður fyrir síma, tölvubúnað og svokallaður starfskostnaður.

Tímabært að gera betur grein fyrir reglum

Það er því ljóst að kostnaður skattborgara við hvern þingmann er oftast talsvert meiri en þingfararkaupið eitt. Hins vegar er erfitt fyrir hinn almenna borgara að henda reiður á því hver fær nákvæmlega hvað og hversu mikið. Steingrímur J. Sigfússon, forseti Alþingis, tekur undir það að auka eigi gagnsæið í reglunum.



„Ég held að það sé eðlilegt að við gerum miklu betur grein fyrir þessu og höfum opnara og aðgengilegra. Ég vona bara að góð samstaða geti tekist um það,“ segir Steingrímur J. Sigfússon, forseti Alþingis.

Hann segir markmiðið að upplýsingar um þessar aukagreiðslur verði öllum opnar, helst á vef Alþingis. Hann segir aftur á móti stuðst við opinberan taxta þegar aksturspeningar eru reiknaðir og því ekki á forræði þingsins að meta hvort þingmenn græði á slíkum greiðslum.

Vill ekki ræða mál einstakra þingmanna

Í Kastljósi í gær upplýsti Ásmundur Friðriksson að hann hefði þegið aksturspening í kosningabaráttu í prófkjöri en hann fékk 4,6 millj­ónir króna end­ur­greiddar vegna akst­­ur­s­­kostn­aðar í fyrra. Þykir Steingrími eðlilegt að innheimta slíkan pening?

„Ég ætla ekki að ræða þetta út frá málefnum einstaks þingmanns en það er alveg rétt að liður í þessari vinnu gæti verið að skerpa á því, framfylgni reglnanna.“

Hafa þingmenn þá haft val um það sjálfir hvort þeir fylgi þessum reglum eða ekki?

„Það er kannski ekki alveg bara þannig, en þessi regla eða viðmiðun er nú nýlega tilkomin og kannski hefur tekið svolítinn tíma að fella þetta allt saman undir hana.“

Þá segir Steingrímur að til standi að taka reglurnar til endurskoðunar innan forsætisnefndar og sú vinna hafi raunar þegar verið hafin fyrir áramót.

„Málið er á dagskrá í forsætisnefnd og ég held menn verði að sýna því aðeins skilning að nú þurfum við að fá tíma til að halda áfram þeirri vinnu,“ segir Steingrímur.