Venjulegt vetrarveður á morgun en svo koma lægðirnar

Skaplega veður verður víðast hvar á morgun en var í dag. Búast má við venjulegu vetrarveðri áður en næsta lægð færist yfir landið seint annað kvöld.

Lægðin sem gengið hefur yfir landið í dag er farin að þynnast og færast frá landinu en líkt og fjallað hefur verið um á Vísi hafa fjölmargir lent í vandræðum um helgina vegna veðurs. Á morgun fá landsmenn þó örlítla pásu frá veðurguðunum.

„Það verður ágætis veður fram eftir degi á morgun. Það verður suðvestanátt og einhver él sunnan og vestanlands,“ segir Helga Ívarsdóttir, veðurfræðingur á Veðurstofu Íslands.

Það mun þó ekki endast lengi því gert er ráð fyrir að önnur lægð fikri sig yfir landið frá og með mánudagskvöldi.

„Þá kemur næsta lægð með kvöldinu með austan hvassviðri eða stormi með ofankomu um landið suðaustanvert. Þessi lægð gengur vestur yfir landið með hvassviðri og snjókomu,“ segir Helga.

Reiknað er þó með því að hún sé með öðru sniði en lægðin um helgina þar sem hún fer mun hraðar yfir.

„Hún ætlar ekkert að doka lengi við og verður farin út af landinu seininpartinn á þriðjudaginn,“ segir Helga.

Reikna má með að veður verði verst fyrst um sinn á Suðausturlandi en lægðin mun fikra sig norður eftir landinu. Um hádegi á þriðjudag verður orðið þokkalegt veður um veður um landið austanvert en enn verður mjög hvasst og snjókoma á norðvestanverðu landinu.

„Eins og staðan er núna virðist höfuðborgarsvæðið ætla að sleppa ansi vel frá þessari lægð sem kemur á morgun. Við erum bara í suðvestan átt með smá éljum. Það er ekki útlit fyrir að við verðum í vandræðum með höfuðborgarsvæðið en eins og við vitum núna um helgina þá þurfa þessar lægðir ekki að færast mikið til,“ segir Helga.

Þá er einnig von á annarri lægð á miðvikudaginn en segir Helga að hún sé með hefðbundnara sniði en sú sem kom um helgina.

„Hún er aðeins stærri um sig og það eru skil sem ganga yfir landið. Við könnumst meira við hana en þessar litlu lægðir sem hafa verið að koma,“ segir Helga.

Veðurhorfur á landinu

Vestan 15-23 m/s sunnan- og vestantil á landinu með snjókomu eða éljum. Hvassast við ströndina. Mun hægari vindur norðan- og austanlands og úrkomulítið, en suðlægari og snjókoma á köflum austanlands. Dregur úr vindi og ofankomu í kvöld og nótt. 

Suðvestan 5-13 m/s um hádegi á morgun. Él sunnan- og vestantil, en þurrt og bjart norðan- og austanlands. Gengur í austan hvassviðri um landið suðaustanvert annað kvöld með snjókomu. Frost yfirleitt 0 til 5 stig.

Veðurhorfur á landinu næstu daga

Á þriðjudag:

Austlæg eða breytileg átt 13-23 m/s og snjókoma aðfaranótt þriðjudags, en hægari vindur og él á Suðurlandi. Snýst í suðlæga átt með deginum, víða 8-15 um hádegi og él, en léttir til á Norður- og Austurlandi. Sunnan stormur og snjókoma við Breiðafjörð og á Vestfjörðum fram eftir degi, en lægir þar einnig undir kvöld. Frost 0 til 5 stig.

Á miðvikudag:

Gengur í austan 15-23 m/s, en 23-28 syðst. Dregur úr vindi síðdegis, allvíða austan 8-15 undir kvöld. Snjókoma eða slydda, einkum á austurhelmingi landsins, en rigning með austurströndinni. Hlýnar í veðri, hiti kringum frostmark síðdegis.

Á fimmtudag:

Austlæg átt 5-10, en 10-15 á Vestfjörðum. Él eða slydduél, en þurrt og bjart um landið suðvestanvert. Víða frostlaust við ströndina, en vægt frost til landsins.

Á föstudag:

Suðvestlæg eða breytileg átt 3-10 og él í flestum landshlutum. Hiti breytist lítið.

Á laugardag:

Suðvestan 5-13 og dálítil él, en léttskýjað norðan- og austanlands. Frost 1 til 8 stig, kaldast í innsveitum fyrir norðan og austan.

Á sunnudag:

Líkur á vaxandi austanátt með ofankomu sunnan- og austanlands. Minnkandi frost.