Launamunur kynjanna dregst saman

Rannsókn Hagstofu Íslands á launamun kynjanna, í samvinnu við aðgerðahóp stjórnvalda og aðila vinnumarkaðarins um launajafnrétti, leiðir í ljós að dregið hefur úr launamun kynjanna á árabilinu 2008 – 2016. Þetta kemur fram í tilkynningu frá Hagstofu Íslands. Niðurstöður rannsóknarinnar  voru kynntar á jafnréttisþingi sem nú stendur yfir.

Konur voru að jafnaði með 6,6% lægri laun en karlar árið 2008 en leiðréttur munur minnkaði í 4,5% árið 2016, metið með hefðbundinni aðhvarfsgreiningu fyrir hvert ár.

Óskýrður launamunur var 4,8% en skýrður launamunur 7,4% á öllu tímabilinu 2008-2016. Skýrður launamunur segir til um hversu stór hluti launamunar skýrist af þeim skýringarþáttum sem lagðir eru til grundvallar í greiningunni en óskýrður stendur fyrir þann launamun sem ekki tókst að skýra.

Skipting tímabilsins 2008-2016 í þriggja ára tímabil leiðir í ljós stöðugt minnkandi launamun og fór óskýrði launamunurinn úr 4,8% á árunum 2008-2010 í 3,6% á árunum 2014-2016.