Gular viðvaranir í gildi en hlýnar smátt og smátt

Gular viðvaranir eru í gildi á Suður- og Suðausturlandi vegna storms. Á vef Veðurstofu Íslands segir að undir Mýrdals- og Eyjafjallajökli sem og vestan- og sunnan undir Öræfajökli megi búast við snörpum vindhviðum sem gætu farið um og yfir 30 metra á sekúndu.

Eru vegfarendur á þessum slóðum beðnir um að sýna aðgát, sérstaklega þeir sem eru á bílum sem taka á sig mikinn vind, til dæmis rútur.

Í hugleiðingum veðurfræðings segir annars að nú hlýni smátt og smátt næsta sólarhringinn. Fer hiti að öllum líkindum yfir frostmark víðast hvar á landinu í dag og á morgun með röku lofti og hlýrri suðaustan átt.

„Búast má við talsverðri úrkomu suðaustan og austanlands. Áfram snjóar í fjöll en rignir á láglendi. Þá er einnig er útlit fyrir að rigni suðvestantil, og ætti svifryksmengunin þá loks að dvína í höfuðborginni.

Svipað útlit er næstu daga og fram yfir helgi, þó dragi heldur úr úrkomu um helgina,“ segir í hugleiðingum veðurfræðings.

Veðurhorfur í dag og næstu daga:

Austan og síðar suðaustan 8-15 m/s en 15-23 og snarpar hviður syðst á landinu og í Öræfum. Lægir heldur á Norðvesturlandi á morgun. Víða rigning með köflum en slydda eða snjókoma í fyrstu. Samfelld úrkoma suðaustanlands og á Austfjörðum, rigning á láglendi en slydda eða snjókoma til fjalla. Hiti 1 til 6 stig í dag en 2 til 8 stig á morgun, mildast sunnanlands.

Á fimmtudag:

Suðaustan 8-15 m/s en 5-10 á norðvestanverðu landinu. Skýjað og víða rigning, talsverð suðaustanlands og á Austfjörðum en úrkomulítið á Norðurlandi. Hiti 2 til 8 stig, mildast syðst.

Á föstudag og laugardag:

Suðaustan 8-13 og dálítil væta, en hægari vindur og þurrt um landið norðanvert. Áfram milt í veðri.

Á sunnudag, mánudag og þriðjudag:

Útlit allhvassa sunnanátt með rigningu sunnan- og vestanlands, en léttskýjað á Norður- og Austurlandi. Hiti 2 til 7 stig, en frystir að nætulagi fyrir norðan og austan.