Vegurinn um Þingvelli sagður þjóðarskömm

„Vegurinn um þjóðgarðinn á Þingvöllum er handónýtur og þjóðarskömm“, segir Ólafur Guðmundsson, einn helsti umferðarsérfræðingur landsins. Gleðifréttin er þó sú að ákveðið hefur verið að hefja endurbætur á veginum strax í vor og klára þær í haust á níu kílómetra kafla.

Með auknum ferðamannastraum til landsins hefur aukning á umferð um þjóðgarðinn á Þingvöllum verið í takt við það. Á sama tíma hefur veginum verið lítið sem ekkert haldið við, enda er hann að hruni komin.

„Það er náttúrulega til háborinnar skammar hvernig þessi vegur í gegnum þjóðgarðinn hefur verið. Það myndi ekki nokkurt land láta sér að detta í hug að bjóða upp á þetta, þessi vegur er bara hreint út sagt ónýtur. Hann er náttúrulega búin að vera til skammar í mörg, mörg ár, en hann er gjörsamlega hrunin núna, hann er allur siginn og allur í holum“, segir Ólafur.

Verði ekkert að gert segir Ólafur að vegurinn breytist í malarveg og það sé að gerast núna, hann sé allur að brotna upp. „Þetta er orðið það slæmt að það er búið að merkja við veginn að þetta sé afar slæmur vegur. Það er ekki við hæfi að hafa svoleiðis í þjóðgarði, ég held að Bandaríkjamenn myndu t.d. ekki bjóða upp á svona veg í Yellowstone“.

Ólafur biður fólk að örvænta ekki því nú er búið að ákveða að fara í endurbætur á Þingvallaveginum strax í vor og ljúka þeim næsta haust.

Um er að ræða 9 kílómetra kafla. Búið er að bjóða verkið út, kostnaðaráætlun hljóðaði upp á 664 milljónir króna en Þjótandi á Ægissíðu við Hellu bauð lægst eða 488 milljónir króna sem er um 73% af kostnaðaráætlun.

„Það á að moka allan veginn upp og breikka hann upp í 8 metra þannig að hann verður með vegöxlum með fullri breidd. Fláarnir verða lagðir á veginum og sett vegrið á hann, en það

verður áfram 50 kílómetra hámarkshraði sem er bara allt í lagi því þetta er mikil hjóla og gönguleið líka, framkvæmdin verður til fyrirmyndar,“ segir Ólafur Guðmundsson.