„Eitthvað sem ég mun aldrei gleyma“

„Mér líður alveg ótrúlega vel. Ég toppaði mig alltaf eftir hvern einsta flutning og ég gat ekki gert meira,“ segir Ari Ólafsson sem flutti lagið Our Choice í fyrri undanriðli keppninnar í Lissabon í kvöld og var ekki á meðal þeirra tíu laga sem komust áfram.

Er þetta fjórða árið í röð sem Ísland kemst ekki upp úr undanriðli og í úrslit.

„Hópurinn sem ég er með er yndislegur, algjörlega æðislegur og ég var betri í kvöld en í dómararennslinu í gær. Ég get farið heim sáttur og ég er það svo sannarlega. Þetta var ótrúlega gott kvöld.“

Ari segist hafa lært rosalega mikið á því að hafa tekið þátt.

„Þetta er eitthvað sem ég mun aldrei gleyma og mun hjálpa mér mikið í framtíðinni. Þetta er bara yndislegt.“

Hann segir að hópurinn sé ótrúlega samheldinn og góður.

„Þessi riðill var rosalega erfiður og þetta er til dæmis í fyrsta skipti þar sem Azerbaijan, Armenía og Grikkland fer ekki áfram. Aserar eru í fyrsta skipti að detta út í sögu Eurovision. Ef maður er að fara detta út, þá gerir maður það í svona riðli. Þetta var ótrúlega skemmtilegt kvöld og ég hef aldrei skemmt mér eins vel. Ég hef aldrei fundið fyrir eins mikilli ást, og á þessu sviðið í kvöld.“