Umboðsmaður Íslands segir Ara standa einan

Einar Bárðarson, sem nú starfar sem samskiptastjóri Hafnarfjarðarbæjar, segir Ara Ólafsson standa einan á sviðinu í Eurovision-keppninni á eftir. Einar áttar sig ekki hvort það er kostur eða galli.

Fáir eru eins fróðir um Eurovision-söngvakeppnina og Einar, sem á árum áður var kallaður umboðsmaður Íslands, vegna umfangsmikilla starfa sinna í tónlistargeiranum. Sjálfur átti hann lag í keppninni 2001, Angel sem Two Tricky flutti eftirminnilega. Einar birtir eftirtektarverðan pistil á Fb-síðu sinni þar sem hann rýnir í stöðu mála nú þegar líður að því að Ari stígi á svið, uppúr klukkan 19 á eftir, pistil sem Vísir étur upp án þess að depla auga. Enda eru skilaboð Einars holl og góð.

Ari einn sem er kostur og galli

Einar segir að þjóðin hafi ekki fylkt sér að baki þessa lags og flytjanda eins sem áður.

„Því fylgja kostir og gallar fyrir unga manninn. Honum finnst kannski hann bera ábyrgð á því og finnst hann þurfa að róa þyngri róður fyrir vikið sem getur lagst misvel í ungan óharðnaðan einstakling. Á hinn bóginn má segja að hann sé alveg frjáls við óyfirstíganlegar væntingar þjóðarinnar sem er erfiður kaleikur úr að drekka.“

Fróðlegt er að sjá þetta með hinu glögga og næma auga umboðsmannsins:

Ari vaxið gríðarlega í áliti hjá Einari

„Þessi ungi maður hefur vaxið gríðarlega í áliti hjá mér eftir því sem ég sé meira til hans,“ segir Einar. Og heldur áfram:

„Hann er flottur fánaberi fyrir okkar hönd. Lagahöfundurinn stendur sig líka afskaplega vel og vinnur sinn þátt af miklum metnaði. Höfum það í huga í kvöld, hvernig sem fer að þetta fólk hefur lagt allt sitt í verkefnið og fylgir því með miklum sóma. Persónu töfrarnir hans hafa skilað sér mjög vel í kynningarvinnunni þeirra núna í aðdraganda keppninnar og vikunnar úti í Lissabon.“

Lagið alls ekki glatað

Og Einar syndir ódeigur gegn strauminum þegar hann fullyrðir að því fari fjarri að lagið sem Ari flytur sé glatað.

Lagið er ekki vont eða glatað eins og margir háværir samfélagsmiðlarar vilja halda fram. En hvort lagið er nógu gott til að fara áfram fer svoldið eftir því hvort hinn lögin séu betri. Það kemur svo í ljós í kvöld.

„En örlög lagsins í kvöld munu algerlega ráðast af því hvernig Ara og hópnum tekst til við flutninginn.“

Og Einar lýkur pistli sínum á uppbyggilegum nótum eins og honum einum er lagið:

„Persónutöfrar Ara eru hans stóra leynivopn og hef hann kemst áfram í kvöld þá eru þeir sem að báru lagið áfram i úrslitin. Sendum honum góða strauma hann þarf á því að halda og á þá skilið.“

Vörumst palladómana

Og Einar biður fólk að gæta hófs í skrifum sínum á samfélagsmiðlum en það er ekki síst á Twitter sem þeir sem láta hafa sig út í það að koma fram opinberlega er hent fyrir ljónin. Þar ríkir sannkölluð veisla þegar Eurovision er yfirstandandi.

„Áður en við byrjum svo að skrifa álit okkar á samfélagsmiðlanna í kvöld, eftir keppni, þá bið ég ykkur að hafa það í huga að drengurinn er 19 ára og þið hafið aldrei unnið Eurovison lokakeppnina frekar en aðrir íslendingar,“ segir Einar og lætur broskall fylgja og óskar landsmönnum góðrar skemmtunar.

Vísir tekur að sjálfsögðu undir þessi uppbyggilegu orð Einars og bendir á að Stefán Árni Pálsson, blaðamaður Vísis, er á staðnum, úti í Lissabon í Portúgal, og mun ekkert fara fram hjá vökulu auga hans.