Guðni horfði á fyrri hálfleikinn á Barnaspítalanum

Guðni Th. Jóhannesson forseti horfði á fyrri hálfleikinn í leik Íslands og Króatíu á HM í Rússlandi í góðum félagsskap á Barnaspítala Hringsins. Guðni heldur upp á fimmtugsafmæli sitt í dag.

Fjölmörg börn og aðstandendur þeirra voru saman komin fyrir framan sjónvarpsskjá á Barnaspítalanum þegar leikurinn hófst. Boðið var upp á súkkulaðiköku fyrir afmælisbarnið.

Guðni hóf afmælisdaginn með göngu upp á Helgafell ofan Hafnarfjarðar en þegar heim var komið beið karlakórinn Fjallabræður eftir forsetanum og söng nokkur lög.

Landspítalinn og Lára Ólafsdóttir birtu nokkrar myndir á Facebook-síðum sínum af því þegar Guðni heimsótti Barnaspítalann skömmu fyrir upphaf leiks Íslands og Króatíu.