Ilmur, Ólafur Darri og fleiri leikarar andlit Reykjavíkurmaraþonsins

Áður en flautað verður til leiks í dag í leik Íslands og Nígeríu á HM verður frumsýnd fyrsta auglýsingin fyrir Reykjavíkurmaraþon Íslandsbanka og hlaupastyrk þetta árið. Með hlaupastyrk er hægt að leggja góðum málefnum lið með því að heita á hlaupara og velja flestir hlaupararnir eitthvað málefni til þess að styrkja. Í fyrra var set met í áheitasöfnun þegar söfnuðust yfir 118 milljónir til 152 félaga.

Í gegnum árin hafa landsþekktir einstaklingar verið í forsvari fyrir maraþonið og vakið athygli á góðgerðarfélögum.  Í ár mun hópur landsþekktra leikara vera í forsvari fyrir hlaupastyrk. Verkefnið er að frumkvæði Ólafs Darra Ólafsson og Ilmar Kristjánsdóttur samkvæmt tilkynningu frá Íslandsbanka. Þau munu ásamt fjölda annarra leikara hvetja landsmenn til að taka þátt í Reykjavíkurmaraþoni og leggja góðum málefnum lið.

Enginn leikaranna fær greitt fyrir þátttöku í auglýsingunni eða verkefninu sem slíku en Íslandsbanki heitir á góðgerðarfélögin sem þau hlaupa fyrir. Eins og áður sagði verður auglýsingin sýnd fyrir landsleikinn sem hefst klukkan þrjú í dag.