Myndband úr byssurannsókn NBC á Íslandi

Bandaríska sjónvarpsstöðin NBC var hér á landi við rannsóknir á byssueign Íslendinga. Í nýju innslagi NBC, sem birt var á vef þeirra í gær og sjá má hér fyrir neðan, er reynt að varpa ljósi á hvernig Íslendingum hefur tekist að ná jafnvægi milli mikillar byssueignar og öryggis. Myndskeiðið er hluti af ítalegri umfjöllun NBC um þetta viðfangsefni en undir lok maímánaðar birti NBC grein um málið, sem Vísir greindi frá á sínum tíma.

Á Íslandi, sem borið er saman við stærð Kentucky-ríkis, er ein byssa fyrir hverja þrjá íbúa. Engu að síður eru skotárásir afar fátíðar hér á landi - ólíkt Bandaríkjunum þar sem þær eru daglegt brauð.

Í borginni St. Louis í Missouri, þar sem búa aðeins færri en á Íslandi, létust til að mynda 193 í fyrra í skotárásum. Vart þarf að taka fram að næstum tvö hundruð Íslendingar voru ekki myrtir með byssu í fyrra.

Sjá einnig: NBC skoðar byssuást Íslendinga

NBC þykir þetta áhugaverð staðreynd og ákvað því að fylgjast með Olaf Garðari Garðarssyni og vegferð hans í átt að skotvopnaleyfi. Olaf segist vilja næla sér í leyfið til að geta veitt rjúpu fyrir jólin.

Á Íslandi tekur um 13 mánuði að öðlast skotvopnaleyfi og þurfa áhugasamir að undirgangast margvísleg próf og viðtöl. Hið sama er ekki upp á teningnum í Bandaríkjunum þar sem víða má kaupa öfluga hríðskotariffla á örfáum mínútum.

NBC slær þó þann varnagla að Bandaríkin séu ekki Ísland. Hér ríkir meiri jöfnuður en vestanhafs, glæpir eru afar fátíðir og því lítil þörf að ganga með byssu á sér í sjálfsvarnarskyni.

Hér fyrir neðan má sjá innslag NBC.