Aldís nýr formaður Sambands íslenskra sveitarfélaga

Aldís Hafsteinsdóttir, bæjarstjóri í Hveragerði er nýr formaður íslenskra sveitarfélaga og jafnframt  fyrsta konan til að gegna formennsku í 73 ára sögu félagsins. Formannskjörið var í morgun á þrítugasta og öðru landsþingi Sambands íslenskra sveitarfélaga.

Halldór Halldórsson, fráfarandi formaður, tilkynnti fyrr á þessu ári, að hann gæfi ekki kost á sér til endurkjörs.

Í framboði voru Aldís Hafsteinsdóttir, bæjarstjóri í Hveragerði og Gunnar Einarsson, bæjarstjóri í Garðabæ en alls höfðu 149 landsþingsfulltrúar kosningarétt á þinginu sem fer fram í Hofi, Akureyri. Aldís fékk 91 atkvæði á móti 49 atkvæðum Gunnars.

Aldís segir ánægjulegt að hafa verið kjörin fyrsta konan til að gegna þessu embætti. „Það fannst mörgum það vera tímabært, í ljósi alls, að kona kæmist til forystu í þessum samtökum sem fagna 80 ára afmæli brátt. Þannig að það er mjög ánægjulegt að vera fyrst til að brjóta þennan múr,“ segir Aldís í samtali við fréttastofu.

Hún segist fyrst og fremst vilja efla sveitastjórnarstigið í starfi sínu sem formaður. „Sveitarfélögin á Íslandi eru mikilvægustu einingarnar í nærþjónustu við íbúana og sem slík skipta þau gríðarlega miklu máli. Það þarf að tryggja sveitarfélögunum aukna tekjustofna til að geta sinnt þeim fjölmörgu og fjölbreyttu verkefnum sem þau þurfa að sinna. Það verður auðvitað stærsta verkefnið,“ segir Aldís.  

Hún telur sig geta orðið góðan brúarsmið milli landsbyggðar og höfuðborgarsvæðsins enda hafi hún lengi verið bæjarstjóri í Hveragerði, sem er í túnfæti Reykjavíkur. „Þessi svæði hafa átt mjög nána samvinnu og hvorugt getur án hins verið.“