Lík bresks auðmanns og eiginkonu hans fundust í Taílandi

Lík breska auðmannsins Alan Hogg og eiginkonu hans Nod Suddaen fundust í morgun niðurgrafin á lóð í norðurhluta Taílands. Um vika er síðan að lögregla á svæðinu lýsti því yfir að líkur væri á að þau hafi orðið fórnarlömb leigumorðingja.

Lík þeirra Hogg og Suddaen, sem bæði voru 64 ára, fundust á niðurgrafin á lóð sinni í Phrae-héraði. Í frétt BBC er haft eftir lögreglu að Hogg hafi verið skotinn til bana, en Suddaen barin til bana með hamri. Tilkynnt var um hvarf þeirra í síðustu viku.

Þrír eru í haldi lögreglu vegna málsins, sakaðir um að hafa framkvæmt morðið að beiðni bróður Suddaen. Sá er einnig í haldi. Lögreglustjórinn Manas Kerdsukho segir ástæður morðanna vera langvinnar fjölskyldudeilur um fjármuni og eignir.

Mennirnir sem grunaðir eru um verknaðinn voru handteknir eftir að lögregla rakti slóð farartækis sem hafði verið á lóð fórnarlambanna til þeirra. Þeir viðurkenndu síðar að hafa banað þeim Hogg og Suddaen.

Hogg kom upprunalega frá Edinborg í Skotlandi og auðgaðist þegar hann rak fatahreinsunarkeðjuna Clayfull. Hann flutti til Taílands fyrir nokkrum árum þar sem hann hafði látið reisa þriggja hæða glæsihýsi ásamt konu sinni.