„Svika­logn inni í lægðar­miðjum“

Búast má við allhvassri sunnanátt og úrkomu á landinu í dag og í kvödl en 995 mb lægð er nú stödd um 500 kílómetra vestur af Reykjanesi. Þetta kemur fram í hugleiðingum veðurfræðings á vef Veðurstofu Íslands þar sem segir jafnframt að hæðarhryggurinn sem færði okkur fallegt og rólegt veður í gær sé nú kominn austur fyrir land.

„Saman valda þessi tvö veðrakerfi allhvassri sunnanátt á landinu og henni fylgir úrkoma, yfirleitt rigning á láglendi, en slydda eða snjókoma til fjalla.

Síðdegis nálgast lægðin og í kvöld er útlit fyrir að miðja hennar verði yfir norðanverðu landinu. Þá verður vindur hægur í þeim landshluta því oft er svokallað svikalogn inni í lægðarmiðjum. Sunnan við lægðarmiðjuna er vestan vindstrengur, hvassviðri eða jafnvel stormur að styrk og í kvöld er gert ráð fyrir að hann herji á Suðvestur- og Suðurland og áfram má búast við vætu á þeim slóðum. Hvassast verður með ströndinni frá Hvalfirði og suður og austur að Vík í Mýrdal, þar er möguleiki á að vindur nái stormstyrk,“ segir í hugleiðingum veðurfræðings.

Á morgun er svo gert ráð fyrir að lægðin grynnist en hún verður þá ennþá stödd norður af landinu.

„Eftir hádegi verður allur vindur úr henni og hvergi gert ráð fyrir meira en 10 m/s. Rigning eða slydda með köflum norðantil á morgun, en þurrt að kalla sunnanlands.

Næsta lægð er síðan væntanleg strax á miðvikudag með stífum vindi og úrkomu á öllu landinu. Ef litið er á spár lengra fram í tímann fyrir vikuna sem nú er að hefjast, þá má segja að heilt yfir sé útlit fyrir að vikan verði bæði vinda- og úrkomusöm með köflum, en slíkt telst venjulegt á þessum árstíma á Íslandi. Þokkalegir dagpartar ættu þó að gefast milli lægða,“ segir á vef Veðurstofunnar en veðurhorfur í dag og næstu daga eru þessar:

Sunnan 10-18 m/s og rigning eða slydda. Dregur úr vindi og úrkomu norðvestantil síðdegis. Gengur í vestan 15-23 suðvestan- og sunnanlands í kvöld og áfram vætusamt, en mun hægari vindur í öðrum landshlutum og þurrt á Norðurlandi. Vestlæg eða breytileg átt 5-13 á morgun. Slydda eða rigning með köflum á norðanverðu landinu, en þurrt að kalla sunnantil. Hiti 2 til 8 stig.

Á þriðjudag:

Vestlæg eða breytileg átt 5-13 m/s, en lægir seinnipartinn. Slydda eða rigning með köflum á norðanverðu landinu, en þurrt sunnantil. Hiti 2 til 7 stig.

Á miðvikudag:

Gengur í austan og norðaustan 13-20 með rigningu eða slyddu, fyrst sunnanlands. Hiti 0 til 8 stig, mildast syðst.

Á fimmtudag:

Snýst í hvassa norðanátt með slyddu eða snjókomu á norðanverðu landinu, rigningu með austurströndinni, en yfirleitt þurrt sunnanlands. Hiti frá frostmarki í innsveitum fyrir norðan, upp í 7 stig syðst. Hægari og úrkomuminna um kvöldið.