Álft olli þriggja bíla árekstri

Tveir voru fluttir á slysadeild eftir þriggja bíla árekstur á Reykjanesbraut til móts við Stekkjabakka á fimmta tímanum í dag.

Samkvæmt heimildum Vísis kom álft þar við sögu sem var á leið sinni gangandi yfir Reykjanesbrautina. Ökumaður sem átti leið um Reykjanesbrautina bremsaði nokkuð snarlega þegar hann sá álftina á veginum en það varð til þess að bíll rakst aftan á bíl hans og þriðji bíllinn lenti aftan á þeim.

Lögregla, sjúkraflutningamenn og tækjabíll frá slökkviliði höfuðborgarsvæðisins fóru á vettvang en eins og fyrr segir voru tveir fluttir á slysadeild. Fremsti bíllinn kastaðist hins vegar á álftina sem drapst.