Bein útsending: Kvöldfréttir Stöðvar 2

Stjórnarformaður Félagsbústaða ætlar ekki að segja af sér af svo stöddu vegna 330 milljóna króna framúrkeyrslu á viðhaldsverkefni fyrirtækisins. Hann segir óheppilegt hvað Innri endurskoðun Reykjavíkur var lengi að rannsaka málið. Oddviti Sjálfstæðismanna í borginni telur erfitt fyrir meirihlutann í borginni að starfa áfram vegna þessa máls og annarra. Við ræðum við borgarfulltrúa um málið í beinni útsendingu í kvöldfréttum Stöðvar 2.

Lögreglan á Vestfjörðum hefur farið fram á farbann á erlendur karlmanni fyrir að hafa stolið skútu frá Ísafjarðarhöfn í gær. Við hittum hafnarstjóra sem segir málið hið dularfyllsta og greinilegt að þjófurinn kunni vel til verka. Framkvæmdastjóri hjá Landhelgisgæslunni segir að maðurinn hafi hlýtt fyrirmælum gæslunnar og siglt að Rifi þar sem lögreglan handtók hann.

Við ræðum við framkvæmdastjóra Alþjóðaráðs Rauða Krossins sem telur að Ísland muni spila lykilhlutverk í baráttunni gegn kynbundnu ofbeldi á átakasvæðum. Tíu ár eru frá því að Öryggisráð Sameinuðu þjóðanna samþykkti ályktun sem segir beitingu kynferðisofbeldis í hernaði vera stríðsglæp.

Rýnt verður í tillögur nefndar forsætisráðherra um tjáningarfrelsi. Færri tilvik munu falla undi hatursáróður í almennum hegningarlögum og lögreglan mun ekki þurfa að ákæra fyrir raus í kommentakerfum nái þær fram að ganga.

Þær segjast hafa verið næstum eins og hústökufólk, sunnlensku konurnar sem fyrir hartnær þrjátíu árum lögðu undir sig gömlu Þingborg austan Selfoss og gerðu að heimili íslensku ullarinnar. Fyrir vikið varðveittist þetta sögufræga samkomuhús með lifandi starfsemi en það hafði byggst upp samhliða hinni miklu Flóaáveitu. Við lítum í heimsókn þangað.

Þetta og margt fleira í kvöldfréttum Stöðvar 2 klukkan 18:30.