Orri Páll telur sig geta sýnt fram á sakleysi sitt

Orri Páll Dýrason telur sig geta sýnt fram á sakleysi sitt en ásakanir bandarískrar listakonu, Meagan Boyd þess efnis að hann hafi nauðgað sér árið 2013 hafa vakið heimsathygli.

Vísir greindi frá því frá því fyrr í kvöld að lögmaður Orra Páls hafi haft samband við ritstjóra Stundarinnar, þau Jón Trausta Reynisson og Ingibjörgu Dögg Kjartansdóttur, með það fyrir augum að stöðva fyrirhugaða umfjöllun um málið í blaði sem kemur út á morgun. Þar er rætt við Boyd auk tveggja vinkvenna hennar sem telja sig geta staðfest ásakanir hennar. Orra Páli var gefinn kostur á að bregðast við en það gerði hann með því að fá lögmann sinn til að leitast við að stöðva umfjöllunina.

Lögmaður Orra Páls sérfróður um fjölmiðla

Vísir ræddi við Jón Trausta nú í kvöld og hann taldi kröfuna undarlega, meðal annars í ljósi þess að allir helstu fjölmiðlar á Íslandi hafa fjallað um málið auk fjölmargra miðla erlendis.

Það vekur athygli að lögmaður Orra Páls Dýrasonar er Gunnar Ingi Jóhannsson hæstaréttarlögmaður. Gunnar Ingi hefur hefur verið lögmaður blaðamanna og unnið sigra sem slíkur.

Þannig var hann verjandi Bjarkar Eiðsdóttur og Erlu Hlynsdóttur sem unnu mál fyrir Mannréttindadómstóli Evrópu. „Ég held að þetta hafi verið stórkostlegur sigur fyrir tjáningarfrelsið í landinu sem hefur verið í nauðvörn síðustu ár fyrir dómstólnum,“ sagði Gunnar Ingi þá. Þá hefur Gunnar Ingi varði fleiri blaðamenn, svo sem Atla Má Gylfason í frægu máli en í tengslum við það sagði Gunnar Ingi í samtali við Vísi að „Mannréttindadómstóll Evrópu hafi ítrekað staðið vörð um þann rétt blaðamanna, að taka á móti upplýsingum og miðla þeim.“

Segir frásögn Boyd ekki standast

Í bréfi hans, sem Vísir hefur undir höndum segir meðal annars að umbjóðandi hans, Orri Páll, telji sig geta „sýnt fram á að frásögn hennar [Meagan Boyd] geti ekki staðist. Umbj. minn vinnur að því að fá sig hreinsaðan af þessum ásökunum, en hafi í hyggju að gera það utan kastljóss fjölmiðla.“

Í bréfinu segir jafnframt:

„Með bréfi þessu er farið fram á að Útgáfufélagið Stundin ehf. birti ekki frekari umfjallanir um ásakanir konunnar í garð umbj. míns, sérstaklega meðan enn hafa engar sönnur verið færðar fyrir þeim og viðeigandi yfirvöld ekki tekið þær til skoðunar. Tilgangur umfjöllunar Stundarinnar nú getur varla verið annar en sá, að breiða frekar út hinar alvarlegu fullyrðingar og auka lestur tíaritsins á kostnað mikilvægra hagsmuna umbj. míns.“

Þá segir í bréfi Gunnars Inga að Orri Páll áskilji sér allan rétt gagnvart Stundinni ef téð umfjöllun verður birt. Frekari umfjöllun um hann sé freklegt brot á friðhelgi einkalífs hans og fjölskyldu, ekki síst barna hans; „hann á rétt á að njóta friðar um og umfjöllun í samhengi sem hann kærir sig ekki um.“