Karen frá næstu vikur vegna beinbrots

Karen Knútsdóttir, leikmaður Fram í Olísdeild kvenna og lykilmaður í íslenska landsliðinu, er með brotið bein í fæti og verður ekki með Íslandi í undankeppni HM.

Axel Stefánsson gaf út hópinn fyrir undankeppni HM í dag og var Karen ekki í hópnum. Axel staðfesti við RÚV að Karen væri meidd og yrði frá keppni í 4-6 vikur.

Karen fékk högg á fótinn í leik Fram og HK um miðjan október. Í gær kom í ljós að hún væri með brotið bein og yrði frá í 4-6 vikur.

Íslensla landsliðið spilar æfingaleiki í Noregi í lok nóvember og spilar svo leikina þrjá í riðli Íslands í undankeppni HM dagana 30. nóvember - 2. desember. Leikirnir fara fram í Makedóníu.