Gul viðvörun á landinu í dag og á morgun

Búist er við norðaustanátt í dag, víða 13-18 m/s, og rigningu eða slyddu norðan- og austanlands með snjókomu til fjalla. Þurrt verður á Suður- og Vesturlandi, að því er fram kemur í hugleiðingum veðurfræðings á Veðurstofu Íslands. Þá er gul viðvörun Veðurstofu í gildi á Norðaustur- og Austurlandi í dag en viðvörunin færir sig yfir á Suðvesturhornið á morgun.

Þá dregur úr vindi síðdegis í dag en gert er ráð fyrir snjókomu á norðanverðu landinu í kvöld og dálítilli rigningu syðra. Veður fer kólnandi og vægt frost verður í nótt. Á morgun hlýnar svo aftur með vaxandi suðaustanátt og fer að rigna. Hvassviðri eða stormur síðdegis en heldur hægari og þurrt að mestu norðaustanlands. Á laugardag verður hvöss sunnanátt og talsverð rigning en þurrt og bjart veður norðaustantil á landinu. Hiti 8 til 13 stig.

Gul viðvörun veðurstofu tekur jafnframt gildi í dag á Norðurlandi eystra, Austurlandi að Glettingi og á Austfjörðum. Búast má við slyddu eða snjókomu til fjalla, með skafrenningi og lélegu skyggni og versnandi akstursskilyrðum. Þá eru lokanir á vegum mögulegar.

Gul viðvörun tekur einnig gildi á höfuðborgarsvæðinu, Suðurlandi, Faxaflóa og Breiðafirði eftir hádegi á morgun. Búist er við suðaustan hvassviðri eða stormi, 15-23 m/s og talsverðri rigningu. Veður verður varasamt fyrir ökutæki sem taka á sig mikinn vind. Fólk er hvatt til að sýna aðgát og ganga frá lausum munum til að forðast tjón.

Veðurhorfur á landinu næstu daga:

Á laugardag:

Suðaustan 13-20, hvassast suðvestantil, og rigning, en þurrt og bjart norðaustanlands. Hiti 8 til 13 stig. 

Á sunnudag:

Sunnanátt, víða 10-15 m/s, og rigning, einkum suðaustanlands en úrkomulítið um kvöldið. Hiti 5 til 10 stig. 

Á mánudag:

Suðaustan 8-15 og dálítil rigning eða súld, en léttskýjað norðaustantil á landinu. Hiti 3 til 8 stig. 

Á þriðjudag:

Suðaustanátt og dálítil súld um sunnanvert landið, en bjartviðri norðanlands. Hiti 2 til 8 stig. 

Á miðvikudag:

Hæg austlæg átt, dálítil væta og hiti 0 til 5 stig, en léttskýjað og vægt frost norðantil á landinu.