Berst við tárin í afsökunarbeiðni til fjárfesta

Yfirmaður bandarísks vogunarsjóðs hefur sent frá sér myndband þar sem hann biður viðskiptavini sína afsökunar á lélegum fjárfestingum sjóðsins að undanförnu. Háar fjárhæðir eru sagðar hafa fuðrað upp vegna breytinga á olíu- og jarðgasverði, sem vogunarsjóðurinn var illa búinn undir.

Í tíu mínútna löngu myndbandi, sem sjá má hér að neðan, afsakar James Cordier sig í bak og fyrir. Hann segist ávallt hafa litið á alla 290 viðskiptavini vogunarsjóðsins OptionSellers sem fjölskyldumeðlimi sína og reiðir hann sig á ríkar sjómennskulíkingar þegar hann lýsir stjórnunarstíl sínum.

„Mér þykir miður að þessi brotsjór hafi sökkt skipinu okkar,“ segir hann meðal annars og má glögglega heyra Cordier berjast við tilfinningar sínar. Hann segist í myndbandinu telja að „hið hamfarakennda tap“ muni ríða sjóðnum að fullu, sem nú þegar hefur lokað heimasíðu sinni.

Sjóður Cordiers sérhæfði sig í að aðstoða efnaða einstaklinga við viðskipti með valrétti, sem gerir þeim kleift að kaupa eða selja eignir á tilteknu tímabili í framtíðinni á fyrirfram ákveðnu verði.

Hremmingar Cordier eru á vef breska ríkisútvarpsins raktar til sviptinga á eldsneytisverði í liðinni viku. Þannig hækkaði jarðgas nokkuð skarpt síðastliðinn miðvikudag - til þess eins að hrynja síðan daginn eftir. Þar að auki hefur olíuverð lækkað nokkuð hratt á síðustu vikum, eins og Vísir hefur greint frá. Cordier er hins vegar sagður hafa veðjað á að verðið myndi þjóta upp, með geigvænlegum afleiðingum fyrir viðskiptavini sjóðsins.

Ekki liggur hins vegar fyrir hvað Cordier, sem skrifað hefur bók um valréttarviðskipti, tapaði miklum fjármunum viðskiptavina sinna. Að sögn lögfræðings sem ráðinn hefur verið til að leita réttar um 80 viðskiptavina OptionSellers gæti tapið numið 150 milljónum dala hið minnsta, rúmlega 18 milljörðum króna.

Afsökunarbeiðni James Cordier má sjá hér að neðan, en hann beygir af þegar um þrjár mínútur eru liðnar af myndbandinu.