Stefnir í 18 stiga frost

Norðanáttin er loksins að gefa eftir og élin sem hafa dunið á norðanverðu landinu fara minnkandi í dag. Þá herðir frost en ætla má að það geti farið í um 18 stig á norðaustanverðu landinu á morgun.

Samkvæmt Veðurstofunni verður áfram nokkuð bjart sunnantil en að það muni þykkna upp um landið vestanvert. Ætla má að það muni snjóa þar í nótt, þar á meðal á höfuðborgarsvæðinu.

Gert er ráð fyrir því að frostið verði á bilinu 2 til 8 stig í dag.

„Þrátt fyrir að norðanáttin sé að gefa eftir staldrar nístingskalt loft úr norðri við hjá okkur og má búast við hörkufrosti í dag og á morgun,“ segir á vef Veðurstofunnar og er þar vísað sérstaklega til Norður- og Norðausturlands.

Þá er útlit fyrir snjókomu með köflun á morgun eða él nokkuð víða en þegar líður á deginn styttir að mestu upp. Um miðja viku mun svo lægð nálgast úr suðvestri með hlýnandi veðri og bætir í vind með suðurströndinni, jafnvel austanhvassviðri eða stormur um tíma á fimmtudag með rigningu sunnan- og austanlands.

Veðurhorfur á landinu næstu daga

Á þriðjudag:

Vestlæg eða breytileg átt, 3-10 m/s og snjókoma eða él, síst N-lands. Frost 2 til 18 stig, kaldast NA-til, en mildast við SV- og S-ströndina.

Á miðvikudag:

Vaxandi suðaustanátt með snjókomu S- og SV-til, en síðan slyddu eða rigningu, annars þurrt. Hiti 0 til 5 stig með S- og SV-ströndinni, en frost 0 til 12 stig annars staðar.

Á fimmtudag:

Allhvöss eða hvöss austlæg átt með rigningu, en úrkomulítið fyrir norðan. Hlýnar í veðri.

Á föstudag og laugardag:

Austlæg átt með dálítilli rigningu eða snjókomu á víð og dreif, einkum A-til. Frost um mest allt land, en upp í 5 stiga hita með S-ströndinni.

Á sunnudag:

Útlit fyrir vaxandi suðaustlæga átt og lítilsháttar vætu S-lands.