Tveir í haldi grunaðir um að ræna mann í hjólastól

Tveir menn eru í haldi lögreglunnar á höfuðborgarsvæðinu sem grunaðir eru um að brjótast inn í íbúð manns í Hátúni sem notast við hjólastól á þriðja tímanum í gærnótt. Var manninum hrint úr hjólastólnum og hann rændur eignum, farsíma, tölvu og fleiru.

Strax var þrennt grunað um ránið, tveir karlar og ein kona, en annar af mönnunum var handtekinn eftir hádegi í gær. Lögreglan hafði svo hendur í hári hinum manninum. Annar mannanna er á þrítugsaldri en hinn átján ára gamall. Konan er enn ófundin.

Lögreglan hefur ekki ákveðið hversu lengi hún mun halda mönnunum eða hvort farið verður fram á gæsluvarðhald yfir þeim.