Hópur gerði aðsúg að manni

Lögreglan á höfuðborgarsvæðinu fékk laust fyrir hálf eitt í nótt tilkynningu um líkamsárás við veitingahús í miðborginni. Þetta kemur fram í dagbók Lögreglunnar á höfuðborgarsvæðinu.

Hópur manna gerði aðsúg að manni en árásarmennirnir voru farnir af vettvangi þegar lögreglu bar að garði.

Árásarþolinn var fluttur með sjúkrabíl á slysadeild til aðhlynningar en hann var með áverka á höfði.

Þetta var ekki eina líkamsárásin sem átti sér stað í nótt því laust eftir miðnætti barst lögreglu tilkynning um líkamsárás í hverfi 101. Gerandinn var handtekinn og vistaður fyrir rannsókn málsins í fangageymslu lögreglu. Þolandi árásarinnar var fluttur með sjúkrabíl á slysadeild til aðhlynningar en ekki er vitað um alvarleika meiðslanna.