Vogunarsjóðir sagðir geta andað léttar eftir starfslok Buchheit

Lee Buchheit, lögmaðurinn sem íslensk stjórnvöld kölluðu til liðs við sig í samningaviðræðum vegna IceSave-deilunnar hefur tilkynnt að hann hyggist hætta störfum frá og með næsta mánuði. Þar með lýkur glæstum ferli hins 68 ára gamla Bandaríkjamanns.

Fjallað er um tímamótin á vef Financial Times þar sem segir að forstjórar margra vogunarsjóða geti nú andað léttar, enda hafi Buchheit gert það að sérgrein sinni að berjast við slíka sjóði fyrir hönd ýmissa ríkja sem lent hafi í skuldavandræðum.

Buchheit starfar fyrir lögfræðistofuna Cleary Gottlieb Steen & Hamilton og segir í frétt Financial Times að hann hafi leikið lykilhlutverk í að greiða úr nær öllum skuldakrísum fullvalda ríkja undanfarna áratugi.

Bucheit er Íslendingum góðkunnugur enda var hann skipaður formaður íslensku IceSave-samninganefndarinnar árið 2010, sem skilaði samningi við Breta og Hollendinga sem gjarnan er kallaður Icesave III, og þótti hagstæðari en fyrri samningar. Samningurinn var samþykktur af Alþingi en hafnað í þjóðaratkvæðagreiðslu. Málið fór að lokum fyrir EFTA dómstólinn þar sem Ísland var sýknað af kröfu Breta og Hollendinga.

Var Buchheit valinn Maður ársins árið 2010 af Markaðinum, fylgiriti Fréttablaðsins um efnahagsmál fyrir vinnu hans við samninginn.

Þá fengu íslensk stjórnvöld Bucheit einnig til liðs við sig til að vinna að losun fjármagnshafta árið 2014.

Cleary Gottlieb, lögmannsstofan þar sem Buchheit er meðal eigenda, var ásamt öðrum verðlaunuð af tímaritinu American Lawyer fyrir vinnu Buchheits fyrir íslensk stjórnvöld vegna málefna slitabúa föllnu bankanna.

„Ég mun hætta störfum fyrir lögfræðistofuna en ég mun ekki hætta að lifa lífinu,“ skrifaði Buchheit í tölvupósti til viðskiptavina sinna.