Víða rigning eða slydda á morgun

Gert er ráð fyrir hægum vindi og björtu og köldu veðri víða á landinu í dag. Í kvöld bætir í vind um sunnanvert landið og dregur úr frosti. Á morgun má svo búast við austan hvassviðri eða stormi og verður hvassast allra syðst. Þá hlánar sunnantil og verður víða rigning eða slydda á láglendi. Þetta kemur fram í hugleiðingum veðurfræðings á vef Veðurstofu Íslands.

Á morgun dregur jafnframt úr frosti fyrir norðan en þar verður vindur mun hægari og helst lengst af þurrt.

Á miðvikudag og dagana á eftir er svo útlit fyrir að hallist í norðaustanátt á ný og frysti víðast hvar með éljum norðan- og austantil. Þá léttir til sunnan- og vestanlands.

„Þó gæti hitinn komist yfir frostmark yfir hádaginn um landið sunnanvert af og til ef sólar nýtur,“ segir í hugleiðingum veðurfræðings.

Veðurhorfur á landinu næstu daga:

Á þriðjudag:

Gengur í austan 13-23 m/s, hvassast við S-ströndina. Snjókoma, en slydda eða rigning við ströndina, einkum SA-lands. Þurrt N-til á landinu, en dálítil snjókoma og hvessir þar með kvöldinu. Frost 0 til 5 stig síðdegis, en 0 til 5 stiga hiti sunnan heiða. 

Á miðvikudag:

Norðaustan 10-18 m/s. Snjókoma og síðar él N- og A-lands, en þurrt á S- og V-landi eftir hádegi. Hiti 0 til 4 stig syðst, annars 0 til 5 stiga frost. 

Á fimmtudag, föstudag og laugardag:

Norðaustanátt og él, en léttskýjað S- og V-lands. Frost 0 til 8 stig, en kaldara inn til landsins. 

Á sunnudag:

Útlir fyrir hæga breytilega átt með fremur köldu veðri og stöku éljum við N- og A-ströndina.