Hríðarveður á Norður- og Austurlandi

Það verður áfram norðanhríðarveður á Norður- og Austurlandi fram yfir hádegi en svo mun smám saman draga úr vindi og rofa til, að því er fram kemur í hugleiðingum veðurfræðings á vef Veðurstofu Íslands.

Þar segir að léttskýjað verði á sunnanverðu landinu en sums staðar má búast við snörpum vindhviðum við fjöll framan af degi.

Þá er spáð fremur hægri austlægri átt og að bjart verði með köflum á morgun en strekkingur og stöku skúrir eða él við suðurströndina.

Það mun síðan hvessa talsvert sunnanlands annað kvöld með rigningu sums staðar og hlýnandi veðri. Á miðvikudagsmorgun spáir svo austanstormi með rigningu og slyddu um land allt en síðdegis á að lægja og stytta upp.

Veðurhorfur á landinu:

Norðan 10-18 m/s, en 15-23 undir Vatnajökli framan af morgni. Snjókoma eða él á N-verðu landinu, en léttskýjað syðra. Frost víða 0 til 5 stig, en frostlaust syðst og austast. Hægari og úrkomuminni seinni partinn og kólnar heldur.

Suðaustlæg átt, 3-10 m/s og bjart með köflum á morgun, en 10-15 og stöku skúrir eða él við S-ströndina. Hvessir talsvert S-lands um kvöldið, rignir víða þar og hlýnar heldur í veðri.

Á þriðjudag:

Austlæg átt, 8-15 m/s og skýjað með köflum, en 15-23 með S-ströndinni þegar líður á daginn og stöku él syðst. Hiti 0 til 5 stig syðra, en frost annars 1 til 6 stig.

Á miðvikudag:

Gengur í austanstorm með talsverðri rigningu eða slyddu, en snjókomu til fjalla. Lengst af úrkomulítið fyrir norðan. Dregur talsvert úr vindi og úrkomu þegar líður á daginn. Heldur hlýnandi veður.

Á fimmtudag og föstudag:

Allhvöss eða hvöss sunnanátt með rigningu, en þurrt að kalla fyrir norðan. Fremur hlýtt í veðri.

Á laugardag:

Útlit fyrir að lægi og kólni með slyddu eða snjókomu A-lands, en annars þurrt að kalla.