Njarðvíkingar geta sjálfir komið í veg fyrir að KR jafni afrek þeirra í kvöld

KR-ingar geta í kvöld tryggt sér sæti í fimmta bikarúrslitaleiknum í röð vinni þegar Njarðvík í undanúrslitum Geysisbikars karla í körfubolta. Því hefur engu karlaliði tekist í rétt tæpa þrjá áratugi.

KR hefur unnið tvo bikarúrslitaleiki og tapað tveimur bikarúrslitaleikjum á undanförnum fjórum árum en þeir hafa alltaf unnið undanúrslitaleikinn sinn.

Liðin sem KR hefur unnið í undanúrslitunum undanfarin fjögur áru eru Breiðablik (2018), Valur (2017), Grindavík (2016) og Tindastóll (2015).

Njarðvíkingar fóru í bikarúrslitin fimm ár í röð frá 1986 til 1990 en tímabilið 1990-91 þá datt Njarðvíkurliðið út úr bikarnum eftir tap á móti Grindavík í átta liða úrslitum. KR-ingar unnu síðan bikarinn það vorið.

KR-ingar komust í bikarúrslitaleikinn í sex ár í röð frá 1970 til 1975 en þrjú fyrstu árin fór bikarkeppnin fram  fyrir tímabilið.

Leikurinn í kvöld verður fjórði undanúrslitaleikur KR og Njarðvíkur í bikarkeppninni en um leið sá fyrsti síðan 2000 þegar KR-ingar unnu 84-80 í Njarðvík. Þjálfari KR var þá Ingi Þór Steinþórsson eins og núna. Njarðvík hafði betur í undanúrslitunum 1989 en KR vann undanúrslitleik liðanna árið 1982.

Þetta er jafnframt í fjórða sinn sem KR og Njarðvík mætast í bikarleik í Laugardalshöllinni en hingað til hafa þessir leikir þeirra í Höllinni verið bikarúrslitaleikir. KR vann bikarúrslitaleik félaganna 1977 en Njarðvík hefur haft betur í tvö síðustu skipti eða árin 1988 og 2002.

Fimm bikarúrslitaleikir Njarðvíkinga í röð 1986-1990:

1986:  Haukar 93-92 Njarðvík

1987:  Njarðvík 91-69 Valur

1988:  Njarðvík 104-103 KR

1989:  Njarðvík 78-77 (71-71) ÍR

1990:  Njarðvík 90-84 Keflavík

Fjórir bikarúrslitaleikir KR-inga í röð 2015-2018:

2015:  Stjarnan 85-83 KR

2016:  KR 95:79 Þór Þ.

2017:  KR 78:71 Þór Þ.

2018:  KR 69:96 Tindastóll