Gunnar tapaði með minnsta mun eftir dómaraúrskurð

Gunnar Nelson tapaði fyrir Leon Edwards á bardagakvöldinu í UFC í London í kvöld eftir dómaraákvörðun með minnsta mun.

Gunnar byrjaði af krafti og náði Edwards í gólfið eftir rúma mínútu en andstæðingurinn í kvöld var mjög sterkur og hann náði að standa upp aftur. Undir lokin á fyrstu lotunni náði Edwards Gunnari í gólfið en Gunnar hélt það úti.

Önnur lota var mikill dans á gólfinu en undir lokin á lotunni náði Leon að kýla Gunnar í gólfið og fylgdi því eftir með þungum höggum.

Gunnar náði að lifa það af en fékk harkalegt olnbogaskot í andlitið og fékk hann strax stóra bólgu undir auganu.

Þriðja lotan endaði vel fyrir Gunnar en það kom bara of seint. Hann náði Leon loks í gólfið en þá voru aðeins 65 sekúndur eftir á klukkunni og Gunnar náði ekki að setja nógu þung högg á Edwards.

Úrslitin fóru í dómaraúrskurð þar sem tveir dæmdu Edwards í vil og einn Gunnari og sigurinn því Edwards.