KR spilar sögulegan heimaleik í DHL-höllinni á föstudagskvöldið

KR-ingar fögnuðu eflaust vel í gærkvöldi þegar Þór og ÍR komust áfram í undanúrslit Domino´s deildar karla. Ástæðan er sú að allt í einu eru Vesturbæingar komnir með heimavallarrrétt í undanúrslitaeinvígi sínu.

Í fyrsta sinn í sögu úrslitakeppinnar í körfubolta karla voru þrjú af fjórum liðum undanúrslitanna ekki meðal fjögurra efstu liðanna í deildarkeppninni.

Þór og ÍR unnu oddaleiki í gær og tryggðu sér sæti í undanúrslitunum á kostnað Tindastóls og Njarðvíkur. Þór endaði í sjötta sæti í deildinni en ÍR í því sjöunda. KR hafði áður slegið Keflvíkinga út en Keflavíkurliðið varð í fjórða sæti í deildarkeppninni.

Stjarnan er eina liðið sem komst áfram í undanúrslitin af þeim liðum sem voru með heimavallarrrétt í átta liða úrslitunum.

Þetta þýðir allt saman að KR verður með heimavallarrrétt í undanúrslitunum þrátt fyrir að hafa endað bara í fimmta sæti í deildarkeppninni.

KR-liðið skrifar því nýjan kafla í sögu úrslitakeppninnar með því að byrja undanúrslitin á heimavelli.

Ekkert lið í sögunni hefur byrjað undanúrslitin á heimavelli án þess að hafa endað í einu af fjórum efstu sætunum í deildarkeppninni.



Lið í fimmta sæti og neðar sem komast í undanúrslit úrslitakeppninnar

(Frá því að núverandi deildarfyrirkomulag var tekið upp 1996/97)

2019 - 3 lið (5 KR, 6 Þór Þorl., 7 ÍR)

2018 - Ekkert

2017 - 1 lið (6 Keflavík)

2016 - 2 lið (6 Tindastóll, 7 Njarðvík)

2015 - Ekkert

2014 - 1 lið (7 Stjarnan)

2013 - 1 lið (7 KR)

2012 - Ekkert

2011 - 1 lið (5 Stjarnan)

2010 - 2 lið (5 Njarðvík, 6 Snæfell)

2009 - Ekkert

2008 - 2 lið (5 Snæfell, 7 ÍR)

2007 - 1 lið (5 Grindavík)

2006 - Ekkert

2005 - 1 lið (6 ÍR)

2004 - Ekkert

2003 - 2 lið (5 Njarðvík, 6 Tindastóll)

2002 - 1 lið (5 Grindavík)

2001 - Ekkert

2000 - 1 lið (5 KR)

1999 - Ekkert

1998 - 2 lið (6 Keflavík, 8 ÍA)

1997 - 2 leið (5 Njarðvík, 6 KR)