Tvö þúsund súkkulaðikanínur úr verksmiðju Omnom

Tveggja ára þróunarferli liggur að baki páskakanínu Omnom sem steypt er úr dýrindis lakkríssúkkulaði. Kanínan er handgerð, í takmörkuðu upplagi og hefur eingöngu fengist í forsölu á netinu.  Kanínurnar koma í verslun Omnom að Hólmaslóð 4 á laugardaginn og segir Kjartan Gíslason, súkkulaðigerðarmaður og annar eiganda Omnom, kanínurnar rjúka út.

„Ég er glaður að sjá hvað páskakanínan kemur vel út eftir langt ferli. Kanínan fær frábærar viðtökur og ríkur út, það vilja allir láta taka frá fyrir sig eintak,“ segir Kjartan en eingöngu verða steyptar tvö þúsund kanínur.

Dýr eru þema hjá Omnom

Kjartan segist lengi hafa langað til að taka þátt í „páskaeggjaflóðinu“ og eftir miklar vangaveltur var ákveðið að steypa eitthvað annað en egg.

„Okkur fannst eiga vel við okkur að steypa eitthvert dýr en dýr hafa verið þema hjá okkur á umbúðum utan um Omnom súkkulaðið. Páskakanína varð fyrir valinu og við tók mikil hönnunarvinna og mótasmíði. Við bjuggum til allskonar form sem þurfti að aðlaga og finna lausnir á. Við höfðum ekki gert neitt þessu líkt áður og þurftum að breyta framleiðsluferlinu hjá okkur talsvert.

Kanínan var næstum því tilbúin fyrir páskana í fyrra en við vildum fínpússa hana enn frekar. Veronica Filippin er hönnuður Omnom og hannaði kanínuna sama stíl og dýrin á umbúðunum, geometrísk form, sem minna á origami. Við leggjum mikla áherslu á samræmt útlit á öllum okkar vörum,“ segir Kjartan.

„Fyrir næstu páska langar okkur til að steypa úr fleiri súkkulaðitegundum, til dæmis dökka kanínu og einnig úr mjólkursúkkulaði.“

Vinna beint úr bauninni

Omnom hefur blómstrað frá því Kjartan stofnaði fyrirtækið ásamt Óskari Þórðarsyni árið 2013. Í upphafi unnu fjórir starfsmenn hjá fyrirtækinu en í dag telja starfsmenn Omnom 20 manns.

„Við erum komin í 500 fermetra húsnæði og munum stækka upp í 700 fermetra fljótlega. Við höfum alltaf flutt kakóbaunirnar inn sjálfir og vinnum okkar súkkulaði beint úr bauninni. Það tryggir betra bragð,“ segir Kjartan. „Við erum með mikla dreifingu innanlands og nú fæst Omnom súkkulaðið í Bónus. Útflutningur hefur einnig aukist, aðallega til Bandaríkjanna og Bretlands en við seljum einnig í einstaka verslunum í Japan, Singapúr og í Evrópu.“  

Á laugardaginn verður móttaka í versluninni á Hólmaslóð fyrir þá sem keypt hafa páskakanínuna í forsölu en enn er tími til að tryggja sér eintak á omnomchocolate.com.

Þessi kynning er unnin í samstarfi við Omnom.