Fjórði leikur ÍR og KR hefst klukkan 20.00 í kvöld í Hertz Hellinum í Seljaskóli en útsending Domino´s Körfuboltakvölds byrjar 19.15. Eftir leikinn og í hálfleik munu strákarnir í Körfuboltakvöldi síðan fara yfir gang mála.
Þetta gæti verið mikið sigurkvöld fyrir ÍR-inga en ekkert nema sigur dugar aftur á móti KR-ingum eftir tvö töp í röð á heimavelli á móti ÍR-liðinu.
Átta félög hafa verið í sömu stöðu og ÍR-ingar eru í kvöld, á heimavelli og með Íslandsbikarinn „bíðandi eftir sér“ á hliðarlínunni. Aðeins þrjú af þessum átta tókst að landa titlinum í umræddum leik og fjögur liðanna töpuðu þeim leik og líka þeim næsta.
Lið sem hafa verið 2-1 yfir og gátu tryggt sér titilinn á heimavelli
Stjarnan 2013 - 6 stiga tap fyrir Grindavík (82-88) - Varð ekki meistari
Snæfell 2010 - 9 stiga tap fyrir Keflavík (73-82) - Varð samt Íslandsmeistari
Grindavík 2009 - 11 stiga tap fyrir KR (83-94) - Varð ekki meistari
KR 2007 - 2 stiga sigur á Njarðvík í framlengingu (81-83) - Íslandsmeistari
Keflavík 2004 - 20 stiga sigur á Snæfelli (87-67) - Íslandsmeistari
KR 2000 - 20 stiga sigur á Grindavík (83-63) - Íslandsmeistari
Valur 1992 - 22 stiga tap fyrir Keflavík (56-78) - Varð ekki meistari
Keflavík 1991 - 10 stiga tap fyrir Njarðvík (81-91) - Varð ekki meistari
Það eru því til fjölmörg víti til varnaðar fyrir ÍR-inga í sögu úrslitakeppni karla í körfubolta. Hér fyrir neðan má sjá meira um þau fimm skipti af þessum átta þar sem liði í fótsporum ÍR-inga í kvöld tókst ekki að tryggja sér Íslandsmeistaratitilinn.
Keflvíkingar voru 2-1 yfir á móti Njarðvík eftir 82-78 sigur í Ljónagryfjunni í leik þrjú. Þeir gátu því tryggt sér Íslandsmeistaratitilinn í fjórða leiknum á heimavelli sínum á Sunnubrautinni.
Njarðvíkingar voru hins vegar ekki á því og unnu fjórða leikinn með tíu stigum, 91-81. Teitur Örlygsson var frábær hjá Njarðvíkurliðinu í leiknum og skoraði 27 stig.
Njarðvíkingar tryggðu sér svo Íslandsmeistarabikarinn með 84-75 sigri í oddaleiknum í Njarðvík. Þá var það, Gunnar Örlygsson, bróðir Teits sem fór á kostum og skoraði 27 stig en Teitur var með 15 stig.
Nákvæmlega ári síðar voru Valsmenn í sömu stöðu og gátu tryggt sér Íslandsmeistaratitilinn á heimavelli. Valsliðið hafði unnið þriðja leikinn með 28 stiga mun í Keflavík (95-67) og Valsmenn mættu því örugglega bjartsýnir til leiks.
Keflvíkingar svöruðu aftur á móti með því að bursta Valsmenn á Hlíðarenda, 78-56, eftir að hafa verið 40-19 yfir í hálfleik. Jón Kr. Gíslason fór fyrir Keflavíkurliðinu og var með 17 stig og átti stórleik.
Keflvíkingar fylgdu þessu svo eftir með því að vinna oddaleikinn 77-68 á heimavelli sínum í Keflavík. Jónatan Bow var stigahæstur með 23 stig en Nökkvi Már Jónsson skoraði 19 stig.
Grindvíkingar voru búnir að vinna tvo leiki í röð á móti KR þar á meðal 107-94 sigur í Vesturbænum í leiknum á undan. Þeir gátu því tryggt sér titilinn með sigri í fjórða leiknum í Grindavík.
KR-ingar voru með algjört súperlið en höfðu þegar misst bikarinn mjög óvænt til Stjörnunnar. KR-liðið tryggði sér oddaleik með 94-83 sigri í Grindavík. Fannar Ólafsson átti magnaðan leik fyrir KR, skoraði 20 stig og tók 13 fráköst.
KR tryggði sér síðan Íslandsmeistaratitilinn með eins stigs sigri í DHL-höllinni, 84-83, þar sem Grindvíkingar áttu lokasóknina en leikurinn fór fram í troðfullu húsi í Frostaskjólinu.
Snæfell hafði aldrei orðið Íslandsmeistari en komst í 2-1 eftir fimmtán stiga sigur í Keflavík í þriðja leiknum, 100-85. Liðið gat því tryggt sér fyrsta titilinn á heimavelli í Hólminum.
Keflvíkingar mættu aftur á móti í Hólminn og tryggðu sér oddaleik með 82-73 sigri. Uruele Igbavboa var með 20 stig og 11 fráköst og núverandi leikmaður ÍR, Sigurður Gunnar Þorsteinsson, skoraði 18 stig.
Snæfellingar létu þetta tap þó ekki stoppa sér, heldur mættu til Keflavíkur í oddaleikinn og unnu þar mjög sannfærandi 36 stiga sigur, 105-69, eftir að hafa unnið fyrsta leikhlutann 37-19.
Tveir sem duttu út fyrir ÍR í úrslitakeppninni í ár, Stjörnumaðurinn Hlynur Bæringsson (21 stig og 15 fráköst) og Njarðvíkingurinn Jeb Ivey voru í aðalhlutverki í þessu Snæfellsliði.
25. apríl 2013 í Ásgarði, Garðabæ
Stjörnumenn unnu þriðja leikinn sannfærandi í Grindavík, 101-89, og fengu því tækifæri til að tryggja sér fyrsta Íslandsmeistaratitil félagsins á heimavelli í fjórða leiknum.
Grindvíkingar voru aftur á móti ekkert á því að gefa sig og sóttu sex stiga sigur í Garðabæ, 88-82. Aaron Broussard var magnaður með 37 stig og 12 fráköst. Davíð Ingi Bustion tók 13 fráköst á 18 mínútum og í Grindavíkurliðinu spilaði Sigurður Gunnar Þorsteinsson, núverandi leikmaður ÍR.
Grindavík tryggði sér síðan Íslandsmeistaratitilinn með fimm stiga sigri á heimavelli, 79-74, í oddaleiknum í Röstinni í Grindavík. Stjörnumenn eru enn að bíða eftir fyrsta Íslandsmeistaratitli sínum.
