SGS og Efling vísa kjaradeilu við sveitarfélögin til ríkissáttasemjara

Starfsgreinasamband Íslands og Efling stéttarfélag hafa ákveðið að vísa kjaradeilu til ríkissáttasemjara vegna ósættis um lífeyrismál.

Þetta kemur fram í tilkynningu frá SGS og Eflingu.

Viðræður SGS, Eflingar og Sambands íslenskra sveitarfélaga um nýjan kjarasamning hafa staðið yfir undanfarnar vikur. Samningsaðilar hafa komið saman fimm sinnum.

Í tilkynningunni kemur fram að það hafi komið fulltrúum Eflingar og SGS á óvart þegar fulltrúar sveitarfélaganna hafi neitað að ræða jöfnun lífeyrisréttinda fyrir starfsfólk sveitarfélaga innan aðildarfélaga ASÍ.

Um jöfnun lífeyrisréttinda hefur þegar verið samið við Reykjavíkurborg og ríkið fyrir hönd hópsins.

„Það kom því mjög á óvart þegar fulltrúar sveitarfélaganna neituðu með öllu að ræða þessa eðlilegu jöfnun þrátt fyrir fyrri fyrirheit þar að lútandi í tengslum við kjarasamninga 2015 og vilja ekki kannast við fyrri samþykktir. Í síðustu kjarasamningum voru sérstaklega tekin frá 1,5% til að jafna lífeyrisréttindin. Það er ótrúlegt að sveitarfélögin telji það eðlilegt að félagsmenn okkar búi við lökustu lífeyriskjörin í landinu“.

Af hálfu SGS og Eflingar kemur ekki til greina að halda viðræðum áfram nema lífeyrisréttindi starfsfólks sveitarfélaganna innan ASÍ verði jöfnuð.