Notaði Google Translate til að segjast ætla að sprengja spítalann

Lögreglan á höfuðborgarsvæðinu var kölluð út á slysadeild um klukkan fimm síðdegis í gær vegna manns sem hafði, með aðstoð þýðingarforritsins Google Translate, gefið í skyn að hann ætlaði að sprengja spítalann.

Í dagbók lögreglu kemur fram að lögregla hafi haft afskipti af manninum en hann hafi ekki viljað kannast við sprengjuhótunina. Ekki fást frekari upplýsingar um málið í dagbók lögreglu og þá hefur ekki náðst í lögreglu vegna málsins í morgun.

Þá var tilkynnt um nokkra menn sem áttu í deilum í bílastæðahúsi í miðbænum klukkan fimm í gær og var einn þeirra sagður vera með piparúða. Þegar lögregla kom á staðinn var búið að nota piparúða á einn manninn. Enginn hlutaðeigandi vildi þó tjá sig um hvað hafði gerst eða þiggja aðstoð

Um klukkan þrjú í nótt hafði lögregla svo afskipti af manni sem vann skemmdarverk á bráðamóttöku Landspítalans. Hann kvaðst vera ósáttur við biðina eftir þjónustu.

Þá var tilkynnt um menn að slást við Kópavogslaug upp úr miðnætti. Lögreglan fór á staðinn og ræddi þar við einn aðilann sem greinilega hafði verið í slagsmálum, með blóðnasir og ber að ofan. Hann vildi þó lítið tjá sig um hvað hafði gerst.

Um klukkan eitt eftir miðnætti var ökumaður handtekinn í Breiðholti grunaður um að aka bifreið undir áhrifum fíkniefna. Síðar kom einnig í ljós að hann hafði að öllum líkindum tekið bifreiðina ófrjálsri hendi. Hann gistir fangageymslu.

Þá var tilkynnt um skemmdarverk í skóla í Árbænum um tíuleytið í gærkvöldi. Þar var m.a. búið að brjótast inn í vinnuskúr og aka gröfu um svæðið. Einnig hafði vörubifreið verið ekið á girðingu.